യുഎസിൽ ഭക്ഷണ സ്റ്റാംപ് ആനുകൂല്യങ്ങൾ പകുതിയായി വെട്ടിക്കുറയ്ക്കാൻ നീക്കം

വാഷിങ്ടൻ: ഫെഡറൽ സർക്കാരിന്റെ ഭാഗിക അടച്ചുപൂട്ടലിനെ തുടർന്ന് ദശലക്ഷക്കണക്കിന് അമേരിക്കക്കാരെ ബാധിക്കുന്ന നിർണായക നീക്കവുമായി ട്രംപ് ഭരണകൂടം. നവംബറിലെ ഫൂഡ് സ്റ്റാംപ് (ഭക്ഷണ സ്റ്റാംപ്) ആനുകൂല്യങ്ങൾ പൂർണ്ണമായും നൽകാതെ പകുതിയായി വെട്ടിക്കുറയ്ക്കുമെന്ന് പ്രഖ്യാപിച്ചു. 

സപ്ലിമെന്റൽ ന്യൂട്രീഷ്യൻ അസിസ്റ്റൻസ് പ്രോഗ്രാമിന്റെ (സപ്പ്ളെമെന്റൽ ന്യൂട്രിഷൻ അസിസ്റ്റൻസ് പ്രോഗ്രാം - എസ് എൻ എ പി) ഗുണഭോക്താക്കൾക്ക് നവംബറിൽ നിലവിലെ അലോട്ട്‌മെന്റിന്റെ 50% മാത്രമേ ലഭിക്കൂ എന്ന് യുഎസ് കൃഷി വകുപ്പ് അറിയിച്ചു. ഫെഡറൽ അടച്ചുപൂട്ടൽ കാരണം പ്രോഗ്രാമിന്റെ നിലനിൽപ്പിനായി അടിയന്തര ഫണ്ടിൽ നിന്ന് തുക ഉപയോഗിക്കാൻ തീരുമാനിച്ചു.

യുഎസ് കൃഷി വകുപ്പിലെ ഒരു ഉദ്യോഗസ്ഥൻ ഫെഡറൽ കോടതിയിൽ സമർപ്പിച്ച സത്യവാങ്മൂലത്തിൽ, കണ്ടിജൻസി ഫണ്ടിൽ നിന്നുള്ള ഏകദേശം 4.65 ബില്യൻ ഡോളർ നവംബറിലെ "യോഗ്യതയുള്ള കുടുംബങ്ങളുടെ നിലവിലെ അലോട്ട്‌മെന്റുകളുടെ 50% വഹിക്കാൻ ബാധ്യസ്ഥമായിരിക്കും" എന്ന് വ്യക്തമാക്കുന്നു.