യുഎസ് ഷട്ട്ഡൗൺ: ഫെഡറൽ ജീവനക്കാർക്ക് ശമ്പളം നൽകാനുള്ള റിപ്പബ്ലിക്കൻ ബിൽ തടഞ്ഞ് ഡെമോക്രാറ്റുകൾ

വാഷിങ്ടൻ: സർക്കാർ ഷട്ട്ഡൗൺ സമയത്ത് നഷ്ടപരിഹാരം കൂടാതെ ജോലി ചെയ്തിരുന്ന ഫെഡറൽ ജീവനക്കാർക്ക് ശമ്പളം നൽകുന്നതിനുള്ള നിയമനിർമാണം വ്യാഴാഴ്ച ഡെമോക്രാറ്റുകൾ തടഞ്ഞു. അത്യാവശ്യ സർക്കാർ ജീവനക്കാർക്ക് ശമ്പളം നൽകുന്നതിനായി റിപ്പബ്ലിക്കൻ അവതരിപ്പിച്ച ബില്ലുകളാണ് സെനറ്റിൽ പരാജയപ്പെട്ടത്. 

സർക്കാരിന്റെ അടച്ചുപൂട്ടൽ അവസാനിപ്പിക്കാൻ ഇരു പാർട്ടികളും വിട്ടുവീഴ്ച ചെയ്യാൻ തയാറല്ലെന്നതിന്റെ തുടർച്ചയായ സൂചനയായി. ബിൽ മുന്നോട്ട് കൊണ്ടുപോകാൻ ആവശ്യമായ 60 വോട്ടുകളിൽ 54 വോട്ടുകൾ മാത്രമാണ് ലഭിച്ചത് (45 നെതിരെ 54 വോട്ടുകൾ).

എന്നാൽ, മൂന്ന് സെനറ്റ് ഡെമോക്രാറ്റുകൾ – പെൻസിൽവേനിയയിൽ നിന്നുള്ള ജോൺ ഫെറ്റർമാൻ, ജോർജിയയിൽ നിന്നുള്ള ജോൺ ഒസോഫ്, റാഫേൽ വാർനോക്ക് എന്നിവർ, റിപ്പബ്ലിക്കൻ ബില്ലിനെ അനുകൂലിച്ചു വോട്ട് ചെയ്തു.