യു എസ് ഷട്ട്ഡൗൺ 16-00 ദിവസത്തിലേക്ക് : ഫെഡറൽ ജീവനക്കാർക്ക് ശമ്പളം മുടങ്ങി

വാഷിങ്ടൺ: യുഎസ് ഗവൺമെന്റ് ഷട്ട്ഡൗൺ 16-ാം ദിവസത്തിലേക്ക് കടന്നതോടെ ഈ ആഴ്ച പല ഫെഡറൽ ജീവനക്കാർക്കും ആദ്യമായി ശമ്പളം മുടങ്ങി. എന്നാൽ, എഫ്ബിഐ ഏജന്റുമാർക്കും സൈനികർക്കും ശമ്പളം ഉറപ്പാക്കാൻ ട്രംപ് ഭരണകൂടം പണം മാറ്റിവെച്ചതായി റിപ്പോർട്ടുണ്ട്. ഷട്ട്ഡൗൺ സമയത്തും എഫ്ബിഐ ഏജന്റുമാർക്ക് ശമ്പളം നൽകാൻ ഭരണകൂടം പദ്ധതിയിടുന്നതായി ഏജൻസി ഡയറക്ടർ കാഷ് പട്ടേൽ അറിയിച്ചു. നിലവിൽ ഡ്യൂട്ടിയിലുള്ള സൈനികർക്കും റിസർവ് സേനാംഗങ്ങൾക്കും ശമ്പളം നൽകാൻ ഫണ്ട് കണ്ടെത്താൻ ട്രംപ് പെന്റഗണിന് നിർദ്ദേശം നൽകിയിരുന്നു.

സൈനികരുടെ ശമ്പളത്തിനുള്ള ഫണ്ട്, പെന്റഗണിന്റെ ഗവേഷണ വികസന ഫണ്ടിൽ നിന്ന് എടുക്കുമെന്ന് വൈറ്റ് ഹൗസ് ഓഫീസ് ഓഫ് മാനേജ്മെന്റ് ആൻഡ് ബജറ്റ് (OMB) വക്താവ് അറിയിച്ചു. ഈ ഫണ്ടുകൾ രണ്ട് വർഷത്തേക്ക് ലഭ്യമായവയാണ്. ഷട്ട്ഡൗൺ കാരണം പണം തീർന്നുപോകാൻ സാധ്യതയുണ്ടായിരുന്ന ഡബ്ല്യൂ ഐ സി എന്നറിയപ്പെടുന്ന ഭക്ഷ്യ സഹായ പദ്ധതിക്ക് ഫണ്ട് നൽകാനും ഭരണകൂടം നടപടി സ്വീകരിച്ചു.

അതേസമയം ഫെഡറൽ ജീവനക്കാരിൽ ഭൂരിഭാഗവും ശമ്പളമില്ലാതെ ജോലി തുടരുകയോ അല്ലെങ്കിൽ താൽക്കാലികമായി പിരിച്ചുവിടപ്പെടുകയോ ചെയ്യുന്ന ഈ സാഹചര്യത്തിൽ, ചില വിഭാഗങ്ങൾക്ക് മാത്രം ശമ്പളം ഉറപ്പാക്കാനുള്ള ഭരണകൂടത്തിന്റെ നീക്കം ശ്രദ്ധേയമാണ്.