പനിയും മൂക്കൊലിപ്പും: കാരണം റഷ്യക്കാരിയുടെ നെഞ്ചിലെ സ്പ്രിങ്!,

മോസ്കോ: മൂക്കൊലിപ്പും വിറയലും വിട്ടുമാറാതെ ചികിത്സ തേടിയ റഷ്യക്കാരിയുടെ നെഞ്ചില്‍ സ്പ്രിങ് കുടുങ്ങിയതായി കണ്ടെത്തി. സോഷ്യല്‍ മീഡിയ കണ്ടന്‍റ് ക്രിയേറ്ററായ എകതറിന ബദുലിനയാണ് മരണാസന്നയായി കഴിയുന്നത്.

ആദ്യം ആശുപത്രിയിലെത്തി മരുന്നുമായി മടങ്ങിയെങ്കിലും രോഗാവസ്ഥ കലശലായി. ന്യൂമോണിയ സംശയിച്ച് വീണ്ടും ആശുപത്രിയിലെത്തിയപ്പോള്‍ എക്സ്റേ എടുത്ത് നോക്കി. ഇതിലാണ്, ലോഹത്തിന്‍റെ ഒരു ചെറു സ്പ്രിങ് നെഞ്ചില്‍ കുടുങ്ങിക്കിടക്കുന്നതായി തിരിച്ചറിയുന്നത്. ഏതു നിമിഷവും മരണം സംഭവിച്ചേക്കാമെന്നും ഡോക്ടര്‍മാര്‍ വിലയിരുത്തി.

കൂടുതല്‍ വ്യക്തതക്കായി സി.ടി സ്കാനിനും വിധേയയായി 34കാരി. തുടര്‍ന്ന്, 5 മുതല്‍ 16 മില്ലിമീറ്റര്‍ വരെയുള്ള ലോഹ സ്പ്രിങ് ശ്വാസകോശത്തില്‍ കുടുങ്ങിയതായി സ്ഥിരീകരിച്ചു. 27~ാം വയസ്സില്‍ എകറ്റെറിനക്ക് രക്തം കട്ടപിടിക്കുന്ന ത്രോംബോബോളിസം എന്ന രോഗം കണ്ടെത്തിയിരുന്നു. ചികിത്സയുടെ ഭാഗമായി യുവതിയുടെ കാലില്‍ 33 ട്യൂബുകള്‍ സ്ഥാപിച്ചിരുന്നു. ത്രോംബോബോളിസത്തില്‍നിന്ന് മുക്തി നേടാന്‍ ആ വര്‍ഷം അവള്‍ 20 ശസ്ത്രക്രിയക്ക് വിധേയയായിരുന്നു. സര്‍ജറിക്കിടെയാണ് ശരീരത്തില്‍ സ്പ്രീങ് അകപ്പെട്ടതെന്നും രക്തത്തിലൂടെ ഇത് നീങ്ങിയതാണെന്നും സ്ഥിരീകരിക്കപ്പെട്ടു.