വെസ്റ്റ് ബാങ്കിൽ കനേഡിയൻ നയതന്ത്രജ്ഞർക്ക് നേരെ ഇസ്രയേലി വെടിവയ്‌പ്‌; ഇസ്രയേൽ അംബാസഡറെ വിളിച്ചുവരുത്തി കാനഡ

വെസ്റ്റ് ബാങ്കിലെ ജെനിനിൽ കനേഡിയൻ ഉദ്യോഗസ്ഥർ ഉൾപ്പെട്ട നയതന്ത്ര സംഘത്തിന് നേരെ ഇസ്രായേൽ സൈന്യം മുന്നറിയിപ്പ് വെടിയുതിർത്ത സംഭവത്തിൽ ഇസ്രായേൽ അംബാസഡറെ കനേഡിയൻ വിദേശകാര്യ മന്ത്രി അനിതാ ആനന്ദ് വിളിച്ചുവരുത്തി. സംഭവത്തിൽ സമഗ്രമായ അന്വേഷണവും ഉത്തരവാദിത്തവും ആവശ്യപ്പെട്ടതായി ആനന്ദ് അറിയിച്ചു.

നയതന്ത്ര സംഘം അനുവദനീയമായ വഴിയിൽ നിന്ന് വ്യതിചലിച്ചതിനാലാണ് മുന്നറിയിപ്പ് വെടിവെപ്പ് നടത്തിയതെന്നും ആർക്കും പരിക്കേറ്റിട്ടില്ലെന്നും ഇസ്രായേൽ പ്രതിരോധ സേന (IDF) വ്യക്തമാക്കി. ഈ സംഭവം "തികച്ചും അസ്വീകാര്യമാണെന്ന്" കനേഡിയൻ പ്രധാനമന്ത്രി മാർക്ക് കാർണി വിശേഷിപ്പിച്ചു.

ഗാസയിലെ ഇസ്രായേലിന്റെ സൈനിക നടപടികൾക്കെതിരെ അന്താരാഷ്ട്ര തലത്തിൽ വിമർശനം ഉയരുന്നതിനിടെ, കൂടുതൽ നടപടികൾക്ക് കാനഡ തയ്യാറാണെന്നും അദ്ദേഹം സൂചിപ്പിച്ചു. സംഭവത്തിൽ കാനഡയുടെ ആശങ്ക ഇസ്രായേലിനെ അറിയിക്കുമെന്നും സമഗ്രമായ അന്വേഷണം നടത്തണമെന്നും ആനന്ദ് ആവശ്യപ്പെട്ടു. ഇത് കാനഡയും ഇസ്രായേലും തമ്മിലുള്ള ബന്ധത്തിൽ പുതിയൊരു ഉലച്ചിലിന് കാരണമായിരിക്കുകയാണ്.