അബുദാബിയിൽ വാഹനാപകടത്തിൽ മൂന്ന് സഹോദരങ്ങൾ ഉൾപ്പെടെ നാല് ഇന്ത്യൻ പ്രവാസികൾ മരിച്ചു. മരിച്ചത് മലയാളികള്‍

അബുദാബി:  ഞായറാഴ്ച പുലര്‍ച്ചെ അബുദാബിയില്‍ ഉണ്ടായ വാഹനാപകടത്തില്‍ മൂന്ന് സഹോദരങ്ങളും അവരുടെ വീട്ടുജോലിക്കാരിയും ഉള്‍പ്പെടെ യുഎഇയിലെ നാല് ഇന്ത്യന്‍ പ്രവാസികള്‍ മരിച്ചതായി ഗള്‍ഫ് ന്യൂസ് റിപ്പോര്‍ട്ട് ചെയ്തു. കേരളത്തില്‍ നിന്നുള്ള കുടുംബം ലിവ ഫെസ്റ്റിവലില്‍ പങ്കെടുത്ത ശേഷം ദുബായിലെ വീട്ടിലേക്ക് മടങ്ങുന്നതിനിടെയാണ് അപകടം സംഭവിച്ചത്.

അപകടത്തില്‍ ദമ്പതികളുടെ മൂന്ന് കുട്ടികളും അവരുടെ വീട്ടുജോലിക്കാരിയും മരിച്ചപ്പോള്‍, മാതാപിതാക്കള്‍ക്കും മറ്റ് രണ്ട് സഹോദരങ്ങള്‍ക്കും ഗുരുതരമായി പരിക്കേറ്റതായി ഒരു ബന്ധു ഗള്‍ഫ് ന്യൂസിനോട് പറഞ്ഞു. രക്ഷപ്പെട്ട കുട്ടികളില്‍ ഒരാളുടെ നില ഗുരുതരമാണെന്ന് പറയപ്പെടുന്നു.

അബ്ദുള്‍ ലത്തീഫിന്റെയും റുക്സാനയുടെയും മക്കളായ ആഷാസ് (14), അമ്മാര്‍ (12), അയ്യാഷ് (5), വീട്ടുജോലിക്കാരി ബുഷ്റ എന്നിവരാണ് മരിച്ചതെന്ന് തിരിച്ചറിഞ്ഞു.

അബ്ദുള്‍ ലത്തീഫ്, റുക്സാന, അവരുടെ മറ്റ് രണ്ട് മക്കളായ എസ്സ (10), അസ്സാം (7) എന്നിവര്‍ ഇപ്പോള്‍ അബുദാബിയിലെ ഒരു ആശുപത്രിയില്‍ ചികിത്സയിലാണ്. സംഭവം നടന്നയുടനെ ബന്ധുക്കളും സുഹൃത്തുക്കളും ആശുപത്രിയിലേക്ക് ഓടിയെത്തിയതായി സാമൂഹിക പ്രവര്‍ത്തകന്‍ ഗള്‍ഫ് ന്യൂസിനോട് പറഞ്ഞു.

'കുട്ടികളെ യുഎഇയില്‍ തന്നെ സംസ്‌കരിക്കാന്‍ കുടുംബം തീരുമാനിച്ചു. ശവസംസ്‌കാര ചടങ്ങുകള്‍ക്കും വീട്ടുജോലിക്കാരിയുടെ മൃതദേഹം നാട്ടിലേക്ക് കൊണ്ടുപോകുന്നതിനും ഞങ്ങള്‍ അവരെ പിന്തുണയ്ക്കുന്നു,' സാമൂഹിക പ്രവര്‍ത്തകന്‍ പറഞ്ഞു.

അപകടത്തെക്കുറിച്ച് ഔദ്യോഗിക വിശദീകരണത്തിനായി അബുദാബി പോലീസിനെ സമീപിച്ചിട്ടുണ്ടെന്ന് ഗള്‍ഫ് ന്യൂസ് റിപ്പോര്‍ട്ട് ചെയ്തു.