ഭര്‍ത്താവ് 'മറ്റു' പങ്കാളികളുമായി തിരക്കില്‍; ദുബായ് രാജകുമാരി ഇന്‍സ്റ്റ്ഗ്രാമിലൂടെ മൊഴി ചൊല്ലി

ദുബായ് രാജകുമാരി ഷെയ്ഖ മഹ്റ ബിന്‍ മുഹമ്മദ് ബിന്‍ റാഷിദ് അല്‍ മക്തൂം ഇന്‍സ്ററഗ്രാമിലൂടെ തന്‍റെ വിവാഹമോചനം പ്രഖ്യാപിച്ചു. ദുബായ് ഭരണാധികാരിയും യുഎഇ പ്രധാനമന്ത്രിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമിന്‍റെ മകളാണ് മഹ്റ. ഇന്‍സ്ററഗ്രാമില്‍ ഒരു കുറിപ്പ് പങ്കുവച്ചാണ് മെഹ്റ തന്‍റെ ഭര്‍ത്താവിനെ മൊഴി ചൊല്ലുന്നതായി പ്രഖ്യാപിച്ചത്:

"പ്രിയ ഭര്‍ത്താവേ, നിങ്ങള്‍ മറ്റ് കൂട്ടാളികളുമായി തിരക്കിലായതിനാല്‍, നമ്മുടെ വിവാഹമോചനം ഞാന്‍ ഇതിനാല്‍ പ്രഖ്യാപിക്കുന്നു. ഞാന്‍ നിങ്ങളെ വിവാഹമോചനം ചെയ്യുന്നു, ഞാന്‍ നിങ്ങളെ വിവാഹമോചനം ചെയ്യുന്നു, ഞാന്‍ നിങ്ങളെ വിവാഹമോചനം ചെയ്യുന്നു. നല്ലത് വരട്ടെ. എന്ന് മുന്‍ ഭാര്യ''. ഇതാണ് ഷെയ്ഖ മഹ്റ ഇന്‍സ്ററഗ്രാമില്‍ കുറിച്ചത്. മുത്തലാഖ് ചൊല്ലുന്നതിന് സമാനമായ ഈ പോസ്ററ് നിമിഷങ്ങള്‍ക്കകം തന്നെ വൈറലായി.

ആദ്യ കുഞ്ഞ് ജനിച്ച് രണ്ടു മാസങ്ങള്‍ക്കുളളിലാണ് ദുബായ് രാജകുമാരിയുടെ വിവാഹമോചന പ്രഖ്യാപനം. ആഴ്ച്ചകള്‍ക്ക് മുമ്പ് കുഞ്ഞുമൊത്തുളള ചിത്രം "ഞങ്ങള്‍ രണ്ടുപേരും മാത്രം'' എന്ന അടിക്കുറിപ്പോടെ ഷെയ്ഖ മഹ്റ പങ്കുവച്ചിരുന്നു. അന്നു മുതല്‍ക്കേ ഇവരുടെ വിവാഹമോചന അഭ്യൂഹങ്ങള്‍ സമൂഹമാധ്യമങ്ങളില്‍ ഉയര്‍ന്നുതുടങ്ങിയിരുന്നു.

വിവാഹമോചന പ്രഖ്യാപനത്തിന് പിന്നാലെ ഷെയ്ഖ മഹ്റയ്ക്ക് പിന്തുണ അറിയിച്ച് നിരവധി പേരാണ് എത്തുന്നത്. നല്ല തീരുമാനമാണെന്നും മുത്തലാഖ് ചൊല്ലാന്‍ കാണിച്ച ധൈര്യത്തിന് ബിഗ് സല്യൂട്ട് എന്നുമാണ് സോഷ്യല്‍ ലോകത്തിന്‍റെ കമന്‍റുകള്‍. അതേസമയം ഈ തീരുമാനത്തെ വിമര്‍ശിച്ചും ഒട്ടേറെ ആളുകളെത്തി. ഷെയ്ഖ് മന ബിന്‍ മുഹമ്മദ് ബിന്‍ റാഷിദ് ബിന്‍ മന അല്‍ മക്തൂമാണ് ഷെയ്ഖ മഹ്റയുടെ ഭര്‍ത്താവ്.