അഹ്മദി ഒയാസിസിൽ രണ്ടാമത് 'സിദർ' വൃക്ഷത്തൈ നടീൽ പദ്ധതിയുമായി കെ.പി.സി

കുവൈറ്റ്: പരിസ്ഥിതി സംരക്ഷണ പ്രവർത്തനങ്ങളുടെ ഭാഗമായി കുവൈറ്റ് പെട്രോളിയം കോർപ്പറേഷൻ രണ്ടാമത് 'സിദർ' വൃക്ഷത്തൈ നടീൽ പദ്ധതിക്ക് തുടക്കം കുറിച്ചു. അഹ്മദി ഒയാസിസിൽ വെച്ചാണ് ഈ പരിപാടി സംഘടിപ്പിച്ചത്.

കുവൈറ്റിലെ എണ്ണ മേഖലയിലെ പ്രമുഖരും പരിസ്ഥിതി പ്രവർത്തകരും പങ്കെടുത്ത ചടങ്ങിൽ വരും തലമുറയ്ക്കായി ഹരിതാഭമായ ഒരു രാജ്യം കെട്ടിപ്പടുക്കുക എന്ന ലക്ഷ്യം അടിവരയിട്ടു.

കുവൈറ്റിന്റെ പൈതൃകവുമായി ഏറെ ബന്ധമുള്ള വൃക്ഷമാണ് സിദർ. മണൽക്കാറ്റിനെ പ്രതിരോധിക്കാനും നഗരപ്രദേശങ്ങളിലെ താപനില കുറയ്ക്കാനും ഇത്തരം വനവൽക്കരണ പദ്ധതികൾ സഹായിക്കുമെന്ന് അധികൃതർ വ്യക്തമാക്കി.

കുവൈറ്റിന്റെ 2050-ഓടെയുള്ള കാർബൺ ന്യൂട്രാലിറ്റി ലക്ഷ്യങ്ങളിലേക്കുള്ള ചുവടുവെപ്പുകൂടിയാണ് ഈ പദ്ധതിയെന്ന് കെ.പി.സി വക്താക്കൾ അറിയിച്ചു. 

പരിസ്ഥിതി സന്തുലിതാവസ്ഥ നിലനിർത്തുന്നതിനും പ്രാദേശിക സസ്യജാലങ്ങളെ പ്രോത്സാഹിപ്പിക്കുന്നതിനുമുള്ള നിരന്തരമായ പരിശ്രമങ്ങളുടെ ഭാഗമായാണ് അഹ്മദിയിൽ ഈ രണ്ടാം ഘട്ട നടീൽ ഉത്സവം സംഘടിപ്പിച്ചത്.