കുവൈത്ത് ഡ്രൈവിംഗ് ലൈസൻസ് നിയമങ്ങളിൽ സുപ്രധാന ഭേദഗതികൾ: സ്വകാര്യ വാഹനങ്ങൾക്കും ടാക്സികൾക്കും പുതിയ വ്യവസ്ഥകൾ

കുവൈത്ത്: രാജ്യത്തെ ഡ്രൈവിംഗ് ലൈസൻസ് നിയമങ്ങളിൽ സുപ്രധാനമായ ഭേദഗതികൾ വരുത്തിക്കൊണ്ട് ആഭ്യന്തര മന്ത്രാലയം പുതിയ ഉത്തരവ് പുറത്തിറക്കി.

"കുവൈത്ത് അൽ-യൗം" എന്ന ഔദ്യോഗിക ഗസറ്റിൽ ഇന്ന് പ്രസിദ്ധീകരിച്ച ഈ ഉത്തരവ്, ഡ്രൈവിംഗ് ലൈസൻസുകളുടെ നിബന്ധനകളിൽ കാര്യമായ മാറ്റങ്ങളാണ് കൊണ്ടുവന്നിരിക്കുന്നത്.

2025-ലെ 1257-ാം നമ്പർ ആഭ്യന്തര മന്ത്രാലയത്തിന്റെ ഉത്തരവിലെ 85-ാം വകുപ്പിലെ ഒന്നാം ഖണ്ഡവും, 81/76-ാം നമ്പർ മന്ത്രിസഭാ ഉത്തരവിലെ ട്രാഫിക് നിയമങ്ങളുമായി ബന്ധപ്പെട്ട ചട്ടങ്ങളും ഭേദഗതി ചെയ്തതായി പ്രസ്താവനയിൽ പറയുന്നു.

പ്രധാന ഭേദഗതികൾ ഇവയാണ്:

 പ്രത്യേക ലൈസൻസിനായുള്ള നിബന്ധനകൾ: പുതിയ ഭേദഗതി പ്രകാരം, 7 യാത്രക്കാരിൽ കൂടാത്ത സ്വകാര്യ വാഹനങ്ങൾക്കും, 2 ടണ്ണിൽ കൂടാത്ത ഭാരം വഹിക്കുന്ന ട്രാൻസ്പോർട്ട് വാഹനങ്ങൾക്കും, ടാക്സികൾക്കും, ആംബുലൻസുകൾക്കും മാത്രമായിരിക്കും പ്രത്യേക ഡ്രൈവിംഗ് ലൈസൻസ് അനുവദിക്കുക. ഇത് സ്വകാര്യ വാഹനങ്ങളുടെ ശേഷിയിലും വാണിജ്യ വാഹനങ്ങളുടെ ഭാരപരിധിയിലും വ്യക്തമായ നിയന്ത്രണങ്ങൾ ഏർപ്പെടുത്തുന്നു.

ലൈസൻസ് കാലാവധി: ലൈസൻസ് കാലാവധി സംബന്ധിച്ചും പുതിയ വ്യവസ്ഥകൾ നിലവിൽ വന്നു. കുവൈത്ത് പൗരന്മാർക്കും ഗൾഫ് സഹകരണ കൗൺസിൽ രാജ്യങ്ങളിലെ പൗരന്മാർക്കും 15 വർഷത്തേക്കാണ് ഡ്രൈവിംഗ് ലൈസൻസ് അനുവദിക്കുക. 

അതേസമയം, പ്രവാസികൾക്ക് 5 വർഷത്തേക്ക് മാത്രമായിരിക്കും ലൈസൻസ് കാലാവധി. രാജ്യത്ത് താമസിക്കുന്നവരുടെ ലൈസൻസ് പുതുക്കുന്നത് അവരുടെ താമസ രേഖകൾ നിയമപരമായി പുനഃപരിശോധിക്കുന്നതിന് വിധേയമായിരിക്കും.