പതിനാറാമത് മിഡിൽ ഈസ്റ്റ് ഇന്റർനാഷണൽ ഇൻവെൻഷൻ എക്സിബിഷൻ ഞായറാഴ്ച കുവൈറ്റിൽ തുടക്കമാകും

കുവൈറ്റ്: പതിനാറാമത് മിഡിൽ ഈസ്റ്റ് ഇന്റർനാഷണൽ ഇൻവെൻഷൻ എക്സിബിഷൻ (മധ്യപൂർവ്വദേശ അന്താരാഷ്ട്ര കണ്ടുപിടുത്ത പ്രദർശനം) ഞായറാഴ്ച ആരംഭിക്കുമെന്ന് കുവൈറ്റ് സയന്റിഫിക് സെന്റർ അറിയിച്ചു. കിരീടാവകാശി ഷെയ്ഖ് സബാഹ് ഖാലിദ് അൽ ഹമദ് അൽ സബാഹിന്റെ രക്ഷാകർതൃത്വത്തിലാണ് പ്രദർശനം നടക്കുന്നത്.

ബുധനാഴ്ച നടന്ന പത്രസമ്മേളനത്തിൽ കുവൈറ്റ് സയന്റിഫിക് സെന്റർ ചെയർമാനും പ്രദർശനത്തിന്റെ സുപ്രീം കമ്മിറ്റി തലവനുമായ തലാൽ ജാസിം അൽ ഖറാഫിയാണ് ഇക്കാര്യം അറിയിച്ചത്. രാജ്യാന്തര തലത്തിൽ ശ്രദ്ധേയമായ ഒരു ശാസ്ത്ര വേദി എന്ന നിലയിലേക്ക് ഈ പ്രദർശനം വളർന്നതായി അദ്ദേഹം പറഞ്ഞു.

വർദ്ധിച്ചുവരുന്ന പങ്കാളിത്തവും സ്പോൺസർഷിപ്പും പ്രദർശനത്തിന്റെ പ്രാദേശികവും അന്തർദേശീയവുമായ സ്വീകാര്യതയെ സൂചിപ്പിക്കുന്നുവെന്ന് അദ്ദേഹം കൂട്ടിച്ചേർത്തു. ശാസ്ത്ര-സാങ്കേതിക മേഖലകളിലായി 213 കണ്ടുപിടുത്തക്കാരാണ് ഇത്തവണത്തെ പ്രദർശനത്തിൽ മാറ്റുരയ്ക്കുന്നത്.

"നിക്ഷേപകരെയും കണ്ടുപിടുത്തക്കാരെയും ഒന്നിപ്പിക്കുക" എന്ന ലക്ഷ്യത്തോടെയാണ് ഇത്തവണത്തെ പ്രദർശനം സംഘടിപ്പിക്കുന്നത്. കണ്ടുപിടുത്തങ്ങൾ വിപണിയിലെത്തിക്കാനും ഉൽപ്പാദനത്തിലേക്ക് നീങ്ങാനും ഇത് അവസരമൊരുക്കും.

കുവൈറ്റ് ഇൻവെസ്റ്റ്‌മെന്റ് കമ്പനീസ് യൂണിയൻ ആദ്യമായി പ്രദർശനത്തിൽ പങ്കെടുക്കുന്നുണ്ട്. നിക്ഷേപകരുമായി ബന്ധിപ്പിച്ച് കണ്ടുപിടുത്തങ്ങളെ ഉൽപ്പന്നങ്ങളാക്കി മാറ്റാൻ ഇത് സഹായിക്കുമെന്ന് അൽ ഖറാഫി വ്യക്തമാക്കി.

അറബ് ലീഗിന് കീഴിലുള്ള വിവിധ സംഘടനകളും ജി.സി.സി ജനറൽ സെക്രട്ടേറിയറ്റും പ്രദർശനത്തിൽ സജീവമായി പങ്കെടുക്കുന്നുണ്ട്.

കുവൈറ്റ് ഫൗണ്ടേഷൻ ഫോർ ദ അഡ്വാൻസ്മെന്റ് ഓഫ് സയൻസസ് (KFAS), വേൾഡ് ഇന്റലക്ച്വൽ പ്രോപ്പർട്ടി ഓർഗനൈസേഷൻ (WIPO), യുനെസ്കോ തുടങ്ങിയ അന്താരാഷ്ട്ര സംഘടനകളുടെ പിന്തുണയും പ്രദർശനത്തിനുണ്ട്. ഏകദേശം 60,000 ഡോളറിന്റെ സമ്മാനങ്ങളാണ് ഇവർ വിജയികൾക്കായി നൽകുന്നത്.

65 അംഗങ്ങളടങ്ങിയ ജൂറി കമ്മിറ്റിയാണ് കണ്ടുപിടുത്തങ്ങളെ വിലയിരുത്തുക. വിദേശകാര്യം, വാണിജ്യം, ആഭ്യന്തരം തുടങ്ങിയ മന്ത്രാലയങ്ങളുടെ സഹകരണത്തിനും അൽ ഖറാഫി നന്ദി രേഖപ്പെടുത്തി.