'വികസിത് ഭാരത് 2047': ഇന്ത്യ-കുവൈറ്റ് ഡയലോഗുകൾക്ക് കുവൈറ്റിൽ തുടക്കമായി

കുവൈറ്റ്: ഭാരതത്തെ 2047-ഓടെ വികസിത രാഷ്ട്രമാക്കുക എന്ന ലക്ഷ്യത്തോടെയുള്ള ‘വികസിത് ഭാരത് 2047: ഇന്ത്യ-കുവൈറ്റ് ഡയലോഗുകൾ’ക്ക് കുവൈറ്റിൽ തുടക്കമായി. ഇന്ത്യൻ അംബാസഡർ പരാമിത ത്രിപാഠിയാണ് പരിപാടിയുടെ ഉദ്ഘാടനം നിർവ്വഹിച്ചത്.

ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിലുമായി സഹകരിച്ച് സംഘടിപ്പിച്ച പരമ്പരയിലെ പ്രഥമ പ്രഭാഷണം പ്രമുഖ സാമ്പത്തിക ശാസ്ത്രജ്ഞനും ശിവ് നാടാർ സർവ്വകലാശാല ഡീനുമായ ഡോ. രജത് കത്തൂരിയ നിർവ്വഹിച്ചു.

2026-ലെ കേന്ദ്ര ബജറ്റിന്റെ പശ്ചാത്തലത്തിൽ, ‘വെല്ലുവിളികൾ നിറഞ്ഞ ആഗോള സാഹചര്യത്തിലും ഇന്ത്യ കൈവരിക്കുന്ന സുസ്ഥിര വളർച്ച’ എന്ന വിഷയത്തെ ആസ്പദമാക്കിയായിരുന്നു ഡോ. കത്തൂരിയയുടെ പ്രഭാഷണം. 

ലോകത്തിലെ ഏറ്റവും വേഗത്തിൽ വളരുന്ന വലിയ സമ്പദ്‌വ്യവസ്ഥ എന്ന നിലയിലേക്കുള്ള ഇന്ത്യയുടെ പരിവർത്തനത്തെക്കുറിച്ച് അദ്ദേഹം വിശദീകരിച്ചു. രാജ്യത്തെ ഘടനാപരമായ പരിഷ്കാരങ്ങൾ, ഡിജിറ്റൽ പബ്ലിക് ഇൻഫ്രാസ്ട്രക്ചർ, നിർമ്മാണ മേഖലയുടെ വിപുലീകരണം, ഊർജ്ജസ്വലമായ സ്റ്റാർട്ടപ്പ് ഇക്കോസിസ്റ്റം എന്നിവയാണ് ഇന്ത്യയുടെ സാമ്പത്തിക കുതിപ്പിന് കരുത്തേകുന്നതെന്ന് അദ്ദേഹം ചൂണ്ടിക്കാട്ടി.

ഇന്ത്യയുടെ വികസിച്ചുകൊണ്ടിരിക്കുന്ന സാമ്പത്തിക രംഗത്ത് പങ്കാളികളാകാൻ കുവൈറ്റിന് മുന്നിൽ വലിയ അവസരങ്ങളാണുള്ളതെന്ന് അദ്ദേഹം ഓർമ്മിപ്പിച്ചു.

നിക്ഷേപങ്ങൾ, സാങ്കേതിക സഹകരണം, ഊർജ്ജ പരിവർത്തന മേഖലയിലെ പങ്കാളിത്തം എന്നിവയിലൂടെ ഇരുരാജ്യങ്ങളും തമ്മിലുള്ള തന്ത്രപരമായ ബന്ധം കൂടുതൽ ശക്തമാക്കാൻ സാധിക്കുമെന്നും ഡോ. കത്തൂരിയ കൂട്ടിച്ചേർത്തു. 

ഇന്ത്യയും കുവൈറ്റും തമ്മിലുള്ള സാമ്പത്തിക-നയതന്ത്ര സഹകരണം പുതിയ തലങ്ങളിലേക്ക് എത്തിക്കാൻ ഈ ഡയലോഗുകൾ വേദിയാകുമെന്ന് ഉദ്ഘാടന പ്രസംഗത്തിൽ അംബാസഡർ പരാമിത ത്രിപാഠി പ്രത്യാശ പ്രകടിപ്പിച്ചു.