കുവൈറ്റിൽ സിവിൽ ഡിഫൻസ് ജാഗ്രതാ നിർദ്ദേശം: ഇടവിട്ടുള്ള സൈറൺ മുഴങ്ങുമ്പോൾ പാലിക്കേണ്ട മുൻകരുതലുകൾ

കുവൈറ്റ്: രാജ്യത്ത് അടിയന്തര സാഹചര്യങ്ങളുണ്ടായാൽ പൊതുജനങ്ങൾ പാലിക്കേണ്ട സുരക്ഷാ മാനദണ്ഡങ്ങൾ ഓർമ്മിപ്പിച്ചുകൊണ്ട് ആഭ്യന്തര മന്ത്രാലയം പുതിയ നിർദ്ദേശങ്ങൾ പുറപ്പെടുവിച്ചു.

 പ്രത്യേകിച്ചും 'ഇടവിട്ടുള്ള സൈറൺ ശബ്ദം' കേൾക്കുമ്പോൾ സ്വീകരിക്കേണ്ട അടിയന്തര നടപടികളെക്കുറിച്ചാണ് മന്ത്രാലയം വിശദീകരിക്കുന്നത്.

അപകടം അല്ലെങ്കിൽ പ്രകൃതിദുരന്തം എന്നിവ അടുത്തുണ്ട് എന്നതിന്റെ സൂചനയായാണ് ഈ സൈറൺ കണക്കാക്കപ്പെടുന്നത്. പൊതുജനങ്ങൾ പരിഭ്രാന്തരാകാതെ താഴെ പറയുന്ന നിർദ്ദേശങ്ങൾ അടിയന്തരമായി പാലിക്കണമെന്ന് സിവിൽ ഡിഫൻസ് അറിയിച്ചു.

പ്രധാന നിർദ്ദേശങ്ങൾ:

ശാന്തത കൈവിടരുത്: സൈറൺ മുഴങ്ങുമ്പോൾ പരിഭ്രാന്തരാകാതെ ആത്മസംയമനം പാലിക്കുക.
ഗ്യാസ്, വൈദ്യുതി കണക്ഷനുകൾ: എല്ലാ ഗ്യാസ് സിലിണ്ടറുകളും മെയിൻ സ്വിച്ചുകളും ഉടൻ തന്നെ ഓഫ് ചെയ്യുക.

അപകടസാധ്യതയുള്ള വസ്തുക്കൾ: പെട്ടെന്ന് തീപിടിക്കാൻ സാധ്യതയുള്ള വസ്തുക്കൾ നീക്കം ചെയ്യുകയും സുരക്ഷിതമായ സ്ഥലത്തേക്ക് മാറ്റുകയും ചെയ്യുക.

ലിഫ്റ്റുകൾ ഒഴിവാക്കുക: അടിയന്തര ഘട്ടങ്ങളിൽ കെട്ടിടങ്ങളിലെ ലിഫ്റ്റുകൾ (Elevators) യാതൊരു കാരണവശാലും ഉപയോഗിക്കരുത്. പകരം എമർജൻസി എക്സിറ്റ് വഴിയോ പടികൾ വഴിയോ പുറത്തേക്ക് ഇറങ്ങുക.

അഭയകേന്ദ്രങ്ങളിലേക്ക് മാറുക: ബേസ്‌മെന്റുകളോ അല്ലെങ്കിൽ മന്ത്രാലയം നിർദ്ദേശിച്ചിട്ടുള്ള സുരക്ഷിതമായ അഭയകേന്ദ്രങ്ങളോ ലക്ഷ്യമാക്കി നീങ്ങുക.

ഔദ്യോഗിക വാർത്തകൾ ശ്രദ്ധിക്കുക: സിവിൽ ഡിഫൻസ് നൽകുന്ന തുടർ നിർദ്ദേശങ്ങൾ അറിയാൻ ഔദ്യോഗിക റേഡിയോ, ടെലിവിഷൻ ചാനലുകൾ സ്ഥിരമായി ശ്രദ്ധിക്കുക.

പൊതുജനങ്ങളുടെ സുരക്ഷ ഉറപ്പാക്കുന്നതിനായി മന്ത്രാലയം നൽകുന്ന ഈ മാർഗ്ഗനിർദ്ദേശങ്ങൾ കൃത്യമായി പാലിക്കണമെന്ന് അധികൃതർ അഭ്യർത്ഥിച്ചു.