കുവൈത്തിൽ വൻ മയക്ക് മരുന്ന് വേട്ട: നിർമാണ യുണിറ്റ് പിടിച്ചെടുത്തു

കുവൈറ്റ്: കുവൈറ്റില്‍ സൈക്കോട്രോപിക് പദാര്‍ത്ഥങ്ങള്‍ നിര്‍മ്മിക്കുന്ന ഫാക്ടറി കണ്ടെത്തി. രാജ്യത്തിന്റെ വടക്കന്‍ ഭാഗത്തുള്ള മരുഭൂമി പ്രദേശത്തായിരുന്നു ഫാക്ടറി പ്രവര്‍ത്തിച്ചിരുന്നത്. മൂന്ന് വ്യക്തികളുടെ ഉടമസ്ഥതയിലായിരുന്നു. 

ജനറല്‍ അഡ്മിനിസ്‌ട്രേഷന്‍ ഫോര്‍ കോംബാറ്റിംഗ് നാര്‍ക്കോട്ടിക്‌സ് നടത്തിയ റെയ്ഡില്‍ 55 കിലോഗ്രാം ലിറിക്ക പൌഡര്‍, 35 കിലോഗ്രാം രാസവസ്തുക്കള്‍, 500 ഗ്രാം ക്രിസ്റ്റല്‍ മെത്ത് എന്നിവയുള്‍പ്പെടെ ഏകദേശം 90.5 കിലോഗ്രാം വരുന്ന മയക്കുമരുന്ന് വസ്തുക്കള്‍ പിടിച്ചെടുത്തു. 

600,000 സൈക്കോട്രോപിക് ഗുളികകള്‍, 500,000 ലിറിക്ക കാപ്‌സ്യൂളുകള്‍, 100,000 ക്യാപ്ടഗണ്‍ ഗുളികകള്‍ എന്നിവയും അധികൃതര്‍ പിടിച്ചെടുത്തു.

കൂടാതെ, സൈക്കോട്രോപിക് പദാര്‍ത്ഥങ്ങളും സെന്‍സിറ്റീവ് സ്‌കെയിലും നിര്‍മ്മിക്കാന്‍ ഉപയോഗിക്കുന്ന 12 പ്രത്യേക ഉപകരണങ്ങളും ഓപ്പറേഷനില്‍ കണ്ടെത്തി.

പിടിച്ചെടുത്ത വസ്തുക്കളും സംശയിക്കുന്ന മൂന്ന് പേരെയും തുടര്‍ നിയമനടപടികള്‍ക്കായി ബന്ധപ്പെട്ട അധികാരികള്‍ക്ക് കൈമാറി.