കുവൈത്ത്: പുതിയ അധ്യയന വർഷം ഒരാഴ്ച നേരത്തേ തുടങ്ങും; റമദാനിന്റെ അവസാന പത്ത് ദിവസങ്ങളിൽ അവധി

കുവൈത്ത്: 2025/2026 അധ്യയന വർഷം ഒരു ആഴ്ച നേരത്തേ ആരംഭിക്കാൻ വിദ്യാഭ്യാസ മന്ത്രാലയം.  റമദാനിന്റെ അവസാന പത്ത് ദിവസങ്ങളിൽ അധ്യാപകരും വിദ്യാർത്ഥികളും ആത്മീയ പ്രവർത്തനങ്ങളിൽ പങ്കെടുക്കാൻ കഴിയുന്നവിധം, ഈ കാലയളവിൽ ക്ലാസുകൾ നിർത്തിവയ്ക്കാനാണ് പദ്ധതി.

വിദ്യാഭ്യാസ മന്ത്രാലയത്തിന്റെ പ്രഖ്യാപന പ്രകാരം അധ്യാപകർ 2025 സെപ്റ്റംബർ 1-ന് സേവനം ആരംഭിക്കുകയും വിദ്യാർത്ഥികൾക്ക് ക്ലാസുകൾ 2025 സെപ്റ്റംബർ 7-ന് തുടങ്ങുകയും ചെയ്യും.

റമദാനിന്റെ അവസാന പത്ത് ദിവസങ്ങൾ ആരാധനയ്ക്കും ആത്മീയ ചിന്തകൾക്കുമുള്ള പ്രത്യേക സമയമായതിനാൽ, ഈ കാലയളവിൽ ക്ലാസുകൾ നിർത്തി വിശ്വാസപരമായ ആഴത്തിലുള്ള അനുഭവങ്ങൾക്ക് അവസരം ഒരുക്കുക എന്നതാണ് സർക്കാരിന്റെ ലക്ഷ്യം.

വിദ്യാഭ്യാസ മന്ത്രി സെയ്ദ് ജലാൽ അൽ-തബ്തബൈ, വിദ്യാർത്ഥികൾക്കും അധ്യാപകർക്കും മികച്ച പ്രകടനം കാഴ്ചവെക്കാൻ അനുകൂലമായ  അന്തരീക്ഷം ഒരുക്കാൻ പ്രതിജ്ഞാബദ്ധനാണെന്ന് പറഞ്ഞു.

അതേസമയം, വിദ്യാഭ്യാസ മേൽനോട്ട സ്ഥാനങ്ങൾക്കായുള്ള അപേക്ഷകൾ 2025 ഏപ്രിൽ 27 മുതൽ മേയ് 8 വരെ സ്വീകരിക്കും. മന്ത്രാലയത്തിന്റെ ഔദ്യോഗിക വെബ്സൈറ്റിൽ നിന്നാണ് ഓൺലൈൻ വഴി അപേക്ഷ സമർപ്പിക്കേണ്ടത്.

പന്ത്രണ്ടാം ക്ലാസ് രണ്ടാം സെമസ്റ്റർ പരീക്ഷാ നിയന്ത്രണ പ്രവർത്തനങ്ങൾ 2025 ഏപ്രിൽ 13-ന് ആരംഭിക്കും. കഴിഞ്ഞ വർഷത്തേക്കാൾ 27 ദിവസം വൈകിയാണ് ഈ പ്രവർത്തനങ്ങൾ ആരംഭിക്കുന്നത്.

 വിദ്യാർത്ഥികളുടെ പട്ടികകൾ ഏപ്രിൽ 17-നകം സ്കൂളുകൾ ശരിവരുത്തണം. വിദ്യാഭ്യാസ മേഖലയിലെ ഈ പുതിയ തീരുമാനങ്ങൾ, അധ്യാപനോന്നതത്വത്തിനും ആത്മീയ വളർച്ചയ്ക്കും ഒരുപോലെ അനുകൂലമാകുമെന്നാണ് പ്രതീക്ഷ.