കുവൈറ്റിലെ നുവൈസിബിൽ അത്യാധുനിക ബോർഡർ മെഡിക്കൽ സെന്റർ ആരോഗ്യ മന്ത്രി അഹമദ് അൽ അവാദി ഉദ്ത്ഘാടനം ചെയ്തു

കുവൈറ്റ്: കുവൈറ്റിന്റെ അതിർത്തി ആരോഗ്യ സേവനങ്ങളിൽ ഒരു സുപ്രധാന മുന്നേറ്റത്തിന് വഴിയൊരുക്കി നുവൈസിബിൽ അത്യാധുനിക മെഡിക്കൽ സെന്റർ പ്രവർത്തനമാരംഭിച്ചു.

ആരോഗ്യ മന്ത്രി ഡോ. അഹമ്മദ് അബ്ദുൽ വഹാബ് അൽ-അവാദി സെന്ററിന്റെ ഉദ്ഘാടനം നിർവഹിച്ചു. അതിർത്തി കവാടങ്ങളിൽ സമഗ്രവും ഉയർന്ന നിലവാരമുള്ളതുമായ ആരോഗ്യ സേവനങ്ങൾ ലഭ്യമാക്കുക എന്ന ലക്ഷ്യത്തോടെയാണ് ഈ പുതിയ സംരംഭം.

പുതിയ മെഡിക്കൽ സെന്റർ, കുവൈറ്റിന്റെ കര, കടൽ, വ്യോമ അതിർത്തി കവാടങ്ങളിലെ 13 വ്യത്യസ്ത ആരോഗ്യ കേന്ദ്രങ്ങളിൽ നിന്നുള്ള സേവനങ്ങൾ ആദ്യമായി ഒരൊറ്റ കുടക്കീഴിൽ കൊണ്ടുവരുന്നു. ഇത് പ്രാഥമിക വൈദ്യസഹായം, അടിയന്തര സേവനങ്ങൾ, പൊതുജനാരോഗ്യം, നിരീക്ഷണം, മരുന്ന് വിതരണം എന്നിവയെല്ലാം ഒരൊറ്റ സ്ഥലത്ത് ലഭ്യമാക്കും.

രാജ്യത്തിന്റെ പ്രവേശന കവാടങ്ങളിൽ ആരോഗ്യ സുരക്ഷ ശക്തിപ്പെടുത്തുക എന്ന ലക്ഷ്യത്തോടെയുള്ള ഒരു നൂതന കാഴ്ചപ്പാടാണ് ഈ കേന്ദ്രം മുന്നോട്ട് വെക്കുന്നത്. അടിസ്ഥാന സൗകര്യങ്ങൾ വികസിപ്പിക്കുകയും ആരോഗ്യ സേവനങ്ങളുടെ ഗുണനിലവാരം മെച്ചപ്പെടുത്തുകയും ചെയ്യുക എന്നതാണ് ഇതിന്റെ പ്രധാന ലക്ഷ്യം.

പെട്ടെന്നുള്ള പ്രതികരണം, പകർച്ചവ്യാധി നിരീക്ഷണം, അന്താരാഷ്ട്ര ആരോഗ്യ ചട്ടങ്ങൾ കർശനമായി നടപ്പിലാക്കൽ എന്നിവയിലൂടെ രാജ്യത്തിന്റെ അതിർത്തികളിലെ ആരോഗ്യ സുരക്ഷ ഉറപ്പാക്കുന്നതിൽ ഈ കേന്ദ്രം നിർണായക പങ്ക് വഹിക്കും.

നുവൈസിബ് മെഡിക്കൽ സെന്ററിന്റെ പ്രവർത്തനം ആരംഭിച്ചതോടെ കുവൈറ്റിലെ ആരോഗ്യ മേഖലയിൽ വലിയൊരു മാറ്റത്തിനാണ് തുടക്കമായിരിക്കുന്നത്.

ഇത് യാത്രക്കാർക്കും അതിർത്തിയിലെ ഉദ്യോഗസ്ഥർക്കും കൂടുതൽ കാര്യക്ഷമവും വേഗത്തിലുള്ളതുമായ ആരോഗ്യ സേവനങ്ങൾ ലഭ്യമാക്കാൻ സഹായിക്കും.