അഴിമതിയുടെ വേരറുക്കാൻ കുവൈറ്റ്: തൊഴിൽ വിപണിയിൽ വൻ അഴിച്ചുപണിയും പുതിയ വിസാ നയങ്ങളും ഫ്രീ ലാൻസ് വിസ പരിഗണനയിൽ

 കുവൈറ്റ് സിറ്റി: രാജ്യത്തെ തൊഴിൽ മേഖലയിലെ അഴിമതി വച്ചുപൊറുപ്പിക്കില്ലെന്നും അത് പൂർണ്ണമായും തുടച്ചുനീക്കുമെന്നും കുവൈറ്റ് ഒന്നാം ഉപപ്രധാനമന്ത്രിയും പ്രതിരോധ-ആഭ്യന്തര മന്ത്രിയുമായ ശൈഖ് ഫഹദ് അൽ യൂസഫ് പ്രഖ്യാപിച്ചു. സ്വകാര്യ മേഖലയിലെ കമ്പനി പ്രതിനിധികളുമായി പബ്ലിക് അതോറിറ്റി ഫോർ മാൻപവർ (പി എ എം ) നടത്തിയ കൂടിക്കാഴ്ചയിലാണ് നിർണ്ണായകമായ ഈ പ്രഖ്യാപനങ്ങൾ ഉണ്ടായത്. തൊഴിൽ വിപണിയിലെ എല്ലാ പോരായ്മകളും പരിഹരിക്കാൻ ലക്ഷ്യമിട്ടുള്ള വിപ്ലവകരമായ പരിഷ്കാരങ്ങളാണ് സർക്കാർ നടപ്പിലാക്കുന്നത്.

ഏറ്റവും പ്രധാനപ്പെട്ട നിർദ്ദേശങ്ങളിലൊന്ന്, നിശ്ചിത ഫീസ് നൽകി 'ഫ്രീ വർക്ക്' (ഫ്രീ വർക്ക്‌ ) വിസകൾ അനുവദിക്കുന്നത് സംബന്ധിച്ചുള്ള പഠനമാണ്. ആയിരം ദിനാറോളം വരുന്ന ഫീസോടെ ഇത്തരം വിസകൾ അനുവദിക്കാനാണ് ആലോചന. അതോടൊപ്പം തന്നെ നിയമവിരുദ്ധമായി പ്രവർത്തിക്കുന്ന സ്ഥാപനങ്ങൾക്കെതിരെ കർശന നടപടി ആരംഭിച്ചുകഴിഞ്ഞു. ഇതിനോടകം തന്നെ മൂവായിരത്തിലധികം കമ്പനികളുടെ ലൈസൻസ് റദ്ദാക്കുകയും നിയമവിരുദ്ധമായി രാജ്യത്ത് തങ്ങിയ മുപ്പത്തിയൊമ്പതിനായിരത്തോളം തൊഴിലാളികളെ 2025-ൽ നാടുകടത്തുകയും ചെയ്തു.

ഏതെങ്കിലും പ്രത്യേക രാജ്യക്കാർക്ക് കുവൈറ്റിലേക്ക് വരുന്നതിന് വിലക്കില്ലെന്നും എന്നാൽ ഓരോ തൊഴിലുടമയും തങ്ങളുടെ തൊഴിലാളികളുടെ പൂർണ്ണ ഉത്തരവാദിത്തം ഏറ്റെടുക്കണമെന് വ്യക്തമാക്കി. അഴിമതി തടയുന്നതിന്റെ ഭാഗമായി മാൻപവർ അതോറിറ്റിയിലെ പ്രധാന വിഭാഗങ്ങളിൽ ആറുമാസം കൂടുമ്പോൾ ജീവനക്കാരെ സ്ഥലം മാറ്റുന്ന രീതിയും നടപ്പിലാക്കും.

തൊഴിലാളികളുടെ അവകാശങ്ങൾ സംരക്ഷിക്കുന്ന കാര്യത്തിൽ വിട്ടുവീഴ്ചയുണ്ടാകില്ലെന്നും അവരുടെ ശമ്പളം കൃത്യമായി നൽകുന്നത് ഒരു 'റെഡ് ലൈൻ' ആയി കണക്കാക്കുമെന്നും സർക്കാർ മുന്നറിയിപ്പ് നൽകി. കൂടാതെ, സ്വകാര്യ മേഖലയിൽ സ്വദേശികൾക്ക് മുൻഗണന നൽകുന്നതിനൊപ്പം വ്യാജ ലൈസൻസുകൾ വഴി പൗരന്മാരെ ചതിയിൽപ്പെടുത്തുന്ന പ്രവണതയ്ക്കും അന്ത്യം കുറിക്കും. നിയമലംഘനം കണ്ടെത്തിയ ഒൻപത് നഴ്‌സറികൾ ഉൾപ്പെടെയുള്ള സ്ഥാപനങ്ങൾക്കെതിരെ ഉടൻ നടപടി സ്വീകരിച്ചതായും സർക്കാർ അറിയിച്ചു.