മൂന്നാമതും പരാജയം: ജിദ്ദയില്‍ നടന്നുവരുന്ന ഫിബ ഏഷ്യാ കപ്പ് ടൂര്‍ണമെന്റില്‍ നിന്ന് ഇന്ത്യ പുറത്തായി; അവസാനം തോറ്റത് ആതിഥേയരോട്

ജിദ്ദ: തുടര്‍ച്ചയായ മൂന്നാമത്തെ പരാജയത്തോടെ ജിദ്ദയില്‍ നടന്നുവരുന്ന ഫിബാ  ഏഷ്യാ കപ്പ്  പുരുഷ  ബാസ്‌ക്കറ്റ്ബോള്‍  ചാമ്പ്യന്‍ഷിപ്പില്‍  നിന്ന് ഇന്ത്യ പുറത്തായി. ശനിയാഴ്ച ജിദ്ദയില്‍ നടന്ന ഗ്രൂപ്പ്-സിയിലെ മത്സരത്തില്‍  ആതിഥേയരായ സൗദി അറേബ്യയോട് 59 - 84 ന് പരാജയപ്പെട്ടതോടെയാണ്  ടൂര്‍ണമെന്റില്‍ നിന്നുള്ള  ഇന്ത്യ പുറത്തായത്.    

ഗ്രൂപ്പില്‍ ഒന്നാമതെത്തിയ ചൈന നേരിട്ട് നോക്കൗട്ടില്‍ (ക്വാര്‍ട്ടര്‍ ഫൈനല്‍) പ്രവേശിച്ചു. അതേസമയം സൗദി അറേബ്യ രണ്ടാം സ്ഥാനത്തും ജോര്‍ദാന്‍ മൂന്നാം സ്ഥാനത്തും ഫിനിഷ് ചെയ്തു. ആദ്യ പാദത്തില്‍ ഇന്ത്യ 24-25 എന്ന സ്‌കോറില്‍ മികച്ച പോരാട്ടം കാഴ്ചവെച്ചിരുന്നു.    പാല്‍പ്രീത് സിംഗ് ബ്രാര്‍ പ്രതിരോധത്തില്‍ പ്രധാന പങ്ക് വഹിക്കുകയും കൃത്യമായ ഇടവേളകളില്‍ രണ്ട് പോയിന്റുകള്‍ നേടുകയും ചെയ്തു.

രണ്ടാം പാദത്തില്‍ ആതിഥേയര്‍ മികച്ച പ്രകടനം കാഴ്ചവെക്കുകയും  അതില്‍  14 പോയിന്റ് ലീഡ് നേടുകയും ചെയ്ത സൗദിയ്ക്ക്  പിന്നീട്  തിരിഞ്ഞുനോക്കേണ്ടിവന്നില്ല (41  35).   തുടര്‍ച്ചയായി  സ്‌കോറിംഗ് നടത്തിയ  അവര്‍  വിജയം അടിച്ചെടുക്കുകയും  ചെയ്തു.   

ഇന്ത്യന്‍ കോണ്‍സുലേറ്റ് നടത്തിയ പ്രചാരണം ഏറ്റെടുത്ത്  മികച്ച  ഇന്ത്യന്‍ സാന്നിധ്യമായിരുന്നു ഇന്ത്യ പങ്കെടുത്ത മത്സരങ്ങളില്‍  ഗ്രൗണ്ട്  സാക്ഷിയായത്. ത്രിവര്‍ണ പതാകകള്‍ വീശിയും  കൈയടിച്ചും  കുറവായിട്ടും ഇന്ത്യന്‍ ടീമിന്  മികച്ച  പ്രോത്സാഹനം  സ്റ്റേഡിയത്തില്‍  നിന്നുണ്ടായെങ്കിലും അതൊന്നും വിജയത്തിലെത്തിയില്ല.