രാജ്യാന്തര വിനോദസഞ്ചാര സമ്മേളനം റിയാദിൽ; വിനോദസഞ്ചാര വകുപ്പ് മന്ത്രി ശ്രീപാദ്​ യെസ്സോ നായിക്​​ പങ്കെടുക്കുന്നു; ഇന്ത്യൻ സമൂഹത്തെയും മന്ത്രി അഭിസംബോധനം ചെയ്യും

ജിദ്ദ​: റിയാദിൽ നടക്കുന്ന രാജ്യാന്തര വിനോദസഞ്ചാര ദിനാഘോഷങ്ങളിൽ ഇന്ത്യയെ പ്രതിനിധീകരിച്ച് കേന്ദ്ര വിനോദസഞ്ചാര, തുറമുഖ, കപ്പൽ, ജലഗതാഗത മന്ത്രി ശ്രീപാദ്​ യെസ്സോ നായിക്​​ പങ്കെടുക്കുന്നു.

ഇതിനായി ബുധനാഴ്ച അതിരാവിലെ സൗദി തലസ്ഥാനത്തെത്തിയ കേന്ദ്രമന്ത്രിയെ ഇന്ത്യൻ അംബാസഡർ ഡോ. സുഹേൽ അജാസ്​ ഖാൻ, സൗദി ഓൗദ്യോഗിക പ്രതിനിധികൾ എന്നിവർ ചേർന്ന് ഊഷ്​മളമായി സ്വീകരിച്ചു.

‘ടൂറിസവും ഹരിത നിക്ഷേപങ്ങളും’ എന്ന ശീർഷകത്തിൽ നടക്കുന്ന​ വിനോദസഞ്ചാര സമ്മേളനം വ്യാഴാഴ്ച അവസാനിക്കും. ഇതാദ്യമായാണ് സൗദി അറേബ്യ ഇത്തരമൊരു രാജ്യാന്തര സംഭവത്തിന് ആതിഥ്യമരുളുന്നത്. 120 രാജ്യങ്ങളിൽ നിന്നായി 500ലധികം പ്രതിനിധികളാണ്​ ഇവൻറ്റിൽ പങ്കെടുക്കുന്നത്​.

ലോക വിനോദസഞ്ചാര സമ്മേളനത്തിൽ പ​ങ്കെടുക്കുന്ന മന്ത്രി വ്യാഴാഴ്​ച വൈകീട്ട്​ 4.30ന്​ റിയാദിലെ ഇന്ത്യൻ എംബസിയിൽ പ്രവാസി സാമൂഹികപ്രതിനിധികളെ അഭിസംബോധന ചെയ്യും. മുൻകൂട്ടി രജിസ്​റ്റർ ചെയ്​തവർക്കാണ്​ പരിപാടിയിൽ പ​ങ്കെടുക്കാൻ അവസരം.