ഹജ്ജ് 2024: അറഫാ പ്രസംഗം ഡോ. മാഹിർ ബിൻ ഹമദ്​ അൽമു​​ഐഖ്​ലി നിർവഹിക്കും

മക്ക:    അടുത്തെത്തിയ വിശുദ്ധ ഹജ്ജിൽ അതിസുപ്രധാനമായ അറഫാ നിസ്കാരത്തിനും ഖുതുബയ്ക്കും നേതൃത്വം നൽകുക മക്കയിലെ  മസ്​ജിദുൽ ഹറാം ഇമാമും ഖത്തീബുമായ ഡോ. മാഹിർ ബിൻ ഹമദ്​ അൽമു​​ഐഖ്​ലി ആയിരിക്കും.  ഇതുസംബന്ധിച്ച രാജകീയ വിജ്ഞാപനം  ഇരു ഹറം പരിപാലന ജനറൽ അതോറിറ്റി പുറത്തുവിട്ടു.

ഉമ്മുൽ ഖുറ യൂനിവേഴ്​സിറ്റിയിലെ ശരീഅ കോളേജിൽ നിന്ന്​ ബിരുദാനന്തര ബിരുദം നേടിയ മാഹിർ  ‘തഫ്​സീർ’, ഫിഖ്​ഹ്​’ എന്നിവയിൽ ഡോക്ടറേറ്റ്  സ്ഥാനവും നേടിയിട്ടുണ്ട്.   സ്വന്തവും വ്യത്യസ്തവുമായ  ശൈലിയിലുള്ള  ഡോ.  മാഹിറിന്റെ  വിശുദ്ധ ഖുർആൻ പാരായണം പ്രസിദ്ധമാണ്.   വിശുദ്ധ  ഖുർആൻ മനഃപാഠമാക്കിയ  അദ്ദേഹം  പ്രാഥമിക വിദ്യാഭ്യാസത്തിന്​ ശേഷം മദീനയിലെ ടീച്ചേഴ്‌സ് കോളേജിലാണ്​ തുടർ പഠനം നടത്തിയത്.

ഗണിതശാസ്ത്ര അധ്യാപകനായി ബിരുദം നേടിയ അദ്ദേഹം മക്കയിൽ അധ്യാപകനായി ജോലിയിൽ പ്രവേശിച്ചു. തുടർന്ന് മക്കയിലെ അമീർ അബ്​ദുൽ മജീദ് സ്കൂളിൽ വിദ്യാർഥി ഗൈഡായും പ്രവർത്തിച്ചിട്ടുണ്ട്. 

ഉമ്മുൽ ഖുറ യൂനിവേഴ്സിറ്റിയിലെ കോളേജ് ഓഫ് ജുഡീഷ്യൽ സ്റ്റഡീസ് ആൻഡ് സിസ്റ്റംസ്​ ഡിപ്പാർട്ട്മെൻറിൽ അസിസ്റ്റൻറ് പ്രൊഫസറായി ജോലി ചെയ്​തു.  ബിരുദാനന്തര ബിരുദ പഠനത്തിനും ശാസ്ത്ര ഗവേഷണത്തിനും വേണ്ടിയുള്ള കോളേജിന്റെ വൈസ് ഡീൻ പദവി വഹിച്ചു.  

മക്കയിലെ അൽഅവാലിയിലെ അൽസഅ്​ദി പള്ളി ഇമാമും ഖത്തീബുമായി. 2005, 2006 വർഷങ്ങളിൽ മസ്​ജിദുന്നബവിയിൽ റമദാനി​ലെ ഇമാമായി നി​യമിക്കപ്പെട്ടു. 2007 റമദാനിൽ മസ്​ജിദുൽ ഹറാമിൽ തറാവീഹ്​, തഹജ്ജുദ് നമസ്കാരത്തിന്​ നേതൃത്വം നൽകി.