/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2025/01/31/MyQEz7Bmx41SGqXq2aav.jpg)
റിയാദ്: സൗദിയില്‍ നാളെ വരെയും ഇടിമിന്നലോടുകൂടിയ മഴയ്ക്ക് സാധ്യതയുണ്ടെന്ന് ജനറല്‍ ഡയറക്ടറേറ്റ് ഓഫ് സിവില്‍ ഡിഫന്‍സ് അറിയിച്ചു. മക്ക ഏരിയകളില്‍ നേരിയതോ ഇടത്തരമോ ആയ മഴ ലഭിക്കും. തായിഫ്, മെയ്സാന്‍, അല്‍-മുവൈഹ്, തുര്‍ബ, അല്ലൈത്ത്, ഖുന്‍ഫുദ, ജിദ്ദ, റാബിഗ് തുടങ്ങിയ പ്രദേശങ്ങളില്‍ കനത്ത മഴയും ആലിപ്പഴ വര്‍ഷവും അനുഭവപ്പെടുമെന്ന് മുന്നറിയിപ്പ് നല്‍കിയിട്ടുണ്ട്.
റിയാദിലും പരിസര പ്രദേശങ്ങളിലും കനത്ത മഴ ലഭിക്കും. വെള്ളപ്പൊക്ക സാധ്യതയും ഉണ്ട്. കൂടാതെ ഇവിടങ്ങളില്‍ ആലിപ്പഴ വര്‍ഷവും ശക്തമായ കാറ്റും അനുഭവപ്പെടുമെന്ന് അധികൃതര്‍ മുന്നറിയിപ്പ് നല്‍കി.
സൗദിയുടെ കിഴക്കന്‍ പ്രവിശ്യകളായ ഖാസിം, ഹെയ്ല്‍, വടക്കന്‍ അതിര്‍ത്തി പ്രദേശങ്ങള്‍ എന്നിവിടങ്ങളില്‍ കനത്ത മഴയും അല്‍ ജൗഫ്, മദീന, അല്‍ ബഹ ഏരിയകളില്‍ നേരിയതോ ഇടത്തരമോ ആയ മഴയും ലഭിക്കും.
കനത്ത മഴയുടെ സാഹചര്യങ്ങളില്‍ പൊതുജനങ്ങള്‍ക്ക് മുന്നറിയിപ്പുകളും സിവില്‍ ഡിഫന്‍സ് നല്‍കിയിട്ടുണ്ട്. വെള്ളപ്പൊക്ക സാധ്യതയുള്ള ഏരിയകളിലോ താഴ്വാര പ്രദേശങ്ങളിലോ യാത്ര ചെയ്യുന്നതും ഇവിടങ്ങളില്‍ നീന്തല്‍ പോലുള്ള പ്രവര്‍ത്തനങ്ങളില്‍ ഏര്‍പ്പെടുന്നതും ഒഴിവാക്കാന്‍ അധികൃതര്‍ നിര്‍ദേശിച്ചു.
കാലാവസ്ഥ അറിയിപ്പുകള്‍ ഔദ്യോഗിക പോര്‍ട്ടലുകള്‍ വഴിയോ സാമൂഹിക മാധ്യമങ്ങള്‍ വഴിയോ പിന്തുടരണമെന്നും പൊതുജനങ്ങളോട് ആവശ്യപ്പെട്ടിട്ടുണ്ട്.
തലസ്ഥാന നഗരമായ റിയാദിലും ചുറ്റുമുള്ള മറ്റ് പ്രവിശ്യകളിലും വെള്ളം കയറുന്നതിനാല്‍ അടിയന്തിര പ്രതികരണ സംവിധാനം നടപ്പാക്കിയിട്ടുള്ളതായി മുനിസിപ്പാലിറ്റി അധികൃതര്‍ അറിയിച്ചിരുന്നു.
വെള്ളം ഒഴുകിപ്പോകുന്നതിനുള്ള ചാലുകള്‍ വൃത്തിയാക്കല്‍, ഡ്രെയിനേജുകള്‍ പരിപാലിക്കല്‍, അടിയന്തിര പ്രവര്‍ത്തന കേന്ദ്രങ്ങള്‍ സജ്ജമാക്കുക തുടങ്ങി നിരവധി മുന്‍കരുതല്‍ നടപടികള്‍ ഇതിനോടകം തന്നെ അധികൃതര്‍ സ്വീകരിച്ചിട്ടുണ്ട്. കനത്ത മഴയെത്തുടര്‍ന്ന് ഗതാഗത തടസ്സം ഒഴിവാക്കുന്നതിനും ഡ്രെയിനേജ് വൃത്തിയാക്കുന്നതിനും മറ്റുമായി പ്രധാനപ്പെട്ട ഇടങ്ങളില്‍ ആളുകളെ വിന്യസിച്ചിട്ടുമുണ്ട്.