ബ്രിട്ടനിൽ ഡിസ്പോസിബിൾ വേപ്പുകൾ നിരോധിക്കും; നടപടി കുട്ടികളുടെ ആരോഗ്യം സംരക്ഷിക്കുന്നതിന്റെ ഭാഗമായി; നിരോധനം വർഷാവസാനത്തോടെ പ്രാബല്യത്തിൽ വരും

വർഷാവസാനത്തോടെ ബ്രിട്ടനിൽ ഡിസ്പോസിബിൾ വേപ്പുകൾ നിരോധിക്കും. കുട്ടികളുടെ ആരോഗ്യം സംരക്ഷിക്കുന്നതിന്റെ ഭാഗമായാണ് പുതിയ തീരുമാനം. നിക്കോട്ടിൻ പൗച്ച്കൾ പോലുള്ള വാപ്പിംഗ് ബദലുകളും നിരോധിക്കുന്ന ഉൽപ്പന്നങ്ങളുടെ പരിധിയിൽ വരും.

പാരിസ്ഥിതിക ആഘാതവും കുട്ടികളുടെ ആരോഗ്യത്തിന് അവ സൃഷ്ടിക്കുന്ന അപകടസാധ്യതകളും കാരണം ഉൽപ്പന്നങ്ങൾ നിരോധിക്കുന്നതിനുള്ള നിയമനിർമ്മാണം അവതരിപ്പിക്കാൻ യു കെ, സ്കോട്ടിഷ്, വെൽഷ് സർക്കാരുകൾ ഉദ്ദേശിക്കുന്നു. 

ഗവൺമെൻ്റ് കണക്കുകൾ പ്രകാരം, കഴിഞ്ഞ മൂന്ന് വർഷത്തിനുള്ളിൽ വാപ്പ് ചെയ്യുന്ന കുട്ടികളുടെ എണ്ണം മൂന്നിരട്ടിയായി വർദ്ധിച്ചു, 11 മുതൽ 15 വയസ്സ് വരെ പ്രായമുള്ളവരിൽ 9% പേർ ഈ ദുശീലം സ്വീകരിച്ചിട്ടുണ്ട്.

ഡിസ്പോസിബിൾ വാപ്പുകളുടെ വർദ്ധനവാണ് ഇതിന് പ്രധാന കാരണം.  കഴിഞ്ഞ രണ്ട് വർഷത്തിനുള്ളിൽ, ഡിസ്പോസിബിൾ വാപ്പ് ഉപയോഗിക്കുന്ന 11 മുതൽ 17 വയസ്സ് വരെ പ്രായമുള്ള വാപ്പറുകളുടെ എണ്ണം ഏകദേശം 900% വർദ്ധിച്ചതായി സർക്കാർ കണക്കുകൾ രേഖപ്പെടുത്തുന്നു.

പരിസ്ഥിതി സംരക്ഷണ നിയമപ്രകാരമുള്ള അധികാരങ്ങൾ ഉപയോഗിച്ച് നടപ്പാക്കുന്ന പദ്ധതി തിങ്കളാഴ്ച ഒരു സ്‌കൂൾ സന്ദർശനവേളയിൽ പ്രധാനമന്ത്രി പ്രഖ്യാപിക്കും.

"ഏതൊരു രക്ഷിതാവിനോ അധ്യാപകനോ അറിയാവുന്നതുപോലെ, ഇപ്പോഴത്തെ ഏറ്റവും ആശങ്കാജനകമായ ഒരു പ്രവണത കുട്ടികൾക്കിടയിലെ വാപ്പിംഗ് വർദ്ധനയാണ്, അതിനാൽ ഇത് കൂടുതൽ വഷളാകുന്നതിന് മുമ്പ് നമ്മൾ പ്രവർത്തിക്കണം" പ്രധാനമന്ത്രി പറഞ്ഞു.

"വാപ്പിംഗിൻ്റെ ദീർഘകാല പ്രത്യാഘാതങ്ങൾ അജ്ഞാതമാണ്, അവയിലെ നിക്കോട്ടിൻ അത്യധികം ആസക്തി ഉളവാക്കും, അതിനാൽ പുകവലി ഉപേക്ഷിക്കാൻ സഹായിക്കുന്നതിന് വാപ്പിംഗ് ഒരു ഉപയോഗപ്രദമായ ഉപകരണമാകുമെങ്കിലും, കുട്ടികൾക്ക് വാപ്പിംഗ് വിപണനം ചെയ്യുന്നത് സ്വീകാര്യമല്ല" അദ്ദേഹം കൂട്ടിച്ചേർത്തു.

2024 - ന്റെ അവസാനമോ 2025 - ൻ്റെ തുടക്കമോ ഡിസ്പോസിബിൾ വാപ്പുകളുടെ നിരോധനം നിലവിൽ വരുമെന്നാണ് കരുതുന്നത്.

ഡിസ്പോസിബിളുകൾ നിരോധിക്കുന്നതിനൊപ്പം, കുട്ടികളെ ആകർഷിക്കുന്ന ചില വാപ്പ് ഫ്ലേവറുകൾ നിയന്ത്രിക്കാനും പ്ലെയിൻ പാക്കേജിംഗ് അവതരിപ്പിക്കാനും, ഉൽപ്പന്നങ്ങൾ ഷോപ്പുകളിൽ പ്രദർശിപ്പിക്കുന്ന രീതി മാറ്റാനും പുതിയ അധികാരങ്ങൾ കൊണ്ടുവരുമെന്നും സുനക് അറിയിച്ചു.

പുതിയ നിയമ സംവിദാനങ്ങളുടെ ഭാഗമായി, ഇംഗ്ലണ്ടിലും വെയിൽസിലും കുട്ടികൾക്ക് നിയമവിരുദ്ധമായി വേപ്പ് വിൽക്കുന്ന കടകൾക്ക് 100 പൗണ്ട് പിഴ ചുമത്തും.

"ഈ മാറ്റങ്ങളിലൂടെ നമ്മുടെ കുട്ടികളുടെ ആരോഗ്യം ദീർഘകാലത്തേക്ക് സംരക്ഷിക്കും. അതിലൂടെ ശാശ്വതമായ പാരമ്പര്യം അവശേഷിപ്പിക്കും" സുനക് പറഞ്ഞു.

കുട്ടികൾ വാപ്പിംഗ് ചെയ്യുന്നതിൽ നിന്ന് നിരുത്സാഹപ്പെടുത്താനുള്ള ശ്രമങ്ങൾ ശക്തമായി മുന്നോട്ട് കൊണ്ടുപോകുമ്പോൾ, നിലവിലെ മുതിർന്ന പുകവലിക്കാർക്ക് ആരോഗ്യകരമായ ഒരു ബദലായി സർക്കാർ ഇത് പ്രോത്സാഹിപ്പിക്കുന്നത് തുടരും.

കഴിഞ്ഞ ഏപ്രിലിൽ, ഹെൽത്ത് ഡിപ്പാർട്ട്‌മെൻ്റ് അവതരിപ്പിച്ച 'സ്വാപ്പ് ടു സ്റ്റോപ്പ്' പദ്ധതി പ്രകാരം, ഇംഗ്ലണ്ടിലെ പ്രായപൂർത്തിയായ പുകവലിക്കാരിൽ അഞ്ചിൽ ഒരാൾക്ക് ഈ ദുശീലം ഉപേക്ഷിക്കാൻ പെരുമാറ്റ പിന്തുണക്കൊപ്പം ഒരു വാപ്പ് കിറ്റും നൽകി വരുന്നു. 

"പുകവലി ഉപേക്ഷിക്കാനുള്ള ഒരു ഉപകരണമായി മാത്രമേ വാപ്സ് ഉപയോഗിക്കാവൂ" ആരോഗ്യ സെക്രട്ടറി വിക്ടോറിയ അഡ്കിൻസ് പുതിയ പ്രഖ്യാപനത്തെക്കുറിച്ച് അഭിപ്രായപ്പെട്ടു.