യുക്മ - ഫസ്റ്റ് കോൾ കേരളപൂരം വള്ളംകളി 2025 സോജൻ ജോസഫ് എം.പി ഫ്ളാഗ് ഓഫ് ചെയ്ത് തുടക്കം കുറിക്കും.

യു കെ : യുക്മ - ഫസ്റ്റ് കോൾ കേരളപൂരം വള്ളംകളി 2025 റോഥർഹാം മാൻവേഴ്സ് ലെയ്ക്കിൽ ആഗസ്റ്റ് 30 ശനിയാഴ്ച രാവിലെ പ്രവാസി മലയാളികളുടെ അഭിമാനം സോജൻ ജോസഫ് എം പി ഫ്ളാഗ് ഓഫ് ചെയ്ത് തുടക്കം കുറിക്കും. 31 ടീമുകൾ പൊതു വിഭാഗത്തിലും 11 ടീമുകൾ വനിത വിഭാഗത്തിലും അണി നിരക്കുന്ന ഏഴാമത് യുക്മ വള്ളംകളി യുകെ മലയാളികൾ ഏറെ ആവേശപൂർവ്വം കാത്തിരിക്കുകയാണ്.

കോട്ടയം ഓണംതുരുത്ത് സ്വദേശിയായ സോജൻ ജോസഫ് കൺസർവേറ്റീവ് പാർട്ടിയുടെ 139 വർഷത്തെ കുത്തക തകർത്താണ് ആഷ്ഫോർഡിൽ 1799 വോട്ടുകളുടെ ഭൂരിപക്ഷത്തിൽ വിജയം വരിച്ചത്. മലയാളികൾ ഉൾപ്പടെയുള്ള പ്രവാസികൾ നേരിടുന്ന വിഷയങ്ങളിൽ വളരെ സജീവമായി ഇടപെടുന്ന സോജൻ  ജോസഫ് പാർലമെൻ്ററി പ്രവർത്തനങ്ങളിലും ഏറെ മികവ് തെളിയിച്ച് കഴിഞ്ഞു.

യുക്മ ദേശീയ പ്രസിഡൻ്റ് അഡ്വ. എബി സെബാസ്റ്റ്യൻ്റെ നേതൃത്വത്തിൽ ദേശീയ ഭാരവാഹികളായ ജയകുമാർ നായർ, ഷീജോ വർഗ്ഗീസ്, വർഗ്ഗീസ് ഡാനിയൽ, സ്മിത തോട്ടം, സണ്ണിമോൻ മത്തായി, റെയ്മോൾ നിധീരി, പീറ്റർ താണോലിൽ, ഡോ.ബിജു പെരിങ്ങത്തറ, ജനറൽ കൺവീനർ ഡിക്സ് ജോർജ്ജ്, യുക്മ ദേശീയ സമിതി അംഗങ്ങൾ, റീജിയണൽ ഭാരവാഹികൾ, പോഷക സംഘടന ഭാരവാഹികൾ എന്നിവരുടെ നേതൃത്വത്തിൽ വള്ളംകളിയുടെ അവസാനഘട്ട തയ്യാറെടുപ്പുകൾ നടത്തി വരുന്നു.