യുക്മ നോർത്ത് വെസ്റ്റ് റീജിയണൽ കലാമേള രജിസ്ട്രേഷൻ ഒക്ടോബർ 4 ന് അവസാനിക്കും

യു കെ: വിഗൻ മലയാളി അസോസിയേഷൻ ആതിഥേയത്വം വഹിക്കുന്ന യുക്മ - റോസ്റ്റർ കെയർ നോർത്ത് വെസ്റ്റ് റീജിയൺ കലാമേള  ഒക്ടോബർ  11 തീയതി വിഗണിൽ വച്ച് നടത്തപ്പെടുന്നു. ഡീൻ ട്രസ്റ്റ് വിഗാൻ അങ്കണത്തിലെ വിവിധ വേദികളിലായി അരങ്ങേറുന്ന കലാമേളയിൽ യുക്മ നോർത്ത് വെസ്റ്റ് റീജിയണിലെ അംഗ അസ്സോസിയേഷനുകളിൽ നിന്നുമുള്ള  മത്സരാർത്ഥികൾ ആണ് പങ്കെടുക്കുന്നത്.

കലാമേളയുടെ രജിസ്ട്രേഷൻ ഒക്ടോബർ 4നു  അവസാനിക്കും, കലാമേളയിൽ രജിസ്റ്റർ ചെയ്യുന്നതിന്   നിങ്ങളുടെ പ്രാദേശിക അംഗ അസ്സോസിയേഷൻ ഭാരവാഹികളെ ബന്ധപ്പെടേണ്ടതാണ്. അംഗ അസ്സോസിയേഷനുകൾ എത്രയും പെട്ടന്ന് രജിസ്ട്രേഷൻ നടപടികൾ പൂർത്തിയാക്കി അവസാനനിമിഷതിലെ തിരക്കുകൾ ഒഴിവാക്കണമെന്നു അഭ്യർത്ഥിക്കുന്നു. 

ഒരാള്‍ക്ക് മൂന്നു വ്യക്തിഗത ഇനത്തിലും രണ്ട് ഗ്രൂപ്പ് ഇനത്തിലും പങ്കെടുക്കാവുന്നതാണ്. മത്സരാർത്ഥികളെ പ്രായം അനുസരിച്ച് വിവിധ വിഭാഗങ്ങളായി തിരിച്ചിരിക്കുന്നു. അതനുസരിച്ച് കിഡ്സ്, സബ്-ജൂനിയര്‍, ജൂനിയര്‍, സീനിയര്, സൂപ്പര്‍ സീനിയര്‍ എന്നീ വിഭാഗങ്ങളില്‍ ആയാണ് മത്സരങ്ങൾ നടക്കുന്നത്.

കലാ മത്സരങ്ങളുടെ വിജയത്തിനായി എല്ലാ മലയാളി സുഹൃത്തുക്കളുടെയും കലാസ്നേഹികളുടെയും സഹായ സഹകരണങ്ങള്‍ അഭ്യർത്ഥിക്കുന്നതായി കലാമേള കമ്മറ്റിയ്ക്ക് വേണ്ടി യുക്മ നോര്‍ത്ത് വെസ്റ്റ് റീജിയണല്‍ പ്രസിഡണ്ട് ശ്രീ ഷാജി വരാകുടി, ജനറൽ സെക്രട്ടറി സനോജ് വർഗീസ്,  ആർട്സ്  കോ ഓർഡിനേറ്റർ രാജീവ്, ട്രെഷറർ ശ്രീ ഷാരോൺ എന്നിവര്‍ അറിയിച്ചു.

റീജിയണൽ കലാമേളയിൽ മത്സരിച്ച്  വ്യക്തിഗത ഇനങ്ങളിൽ ഒന്നും രണ്ടും സ്ഥാനങ്ങൾ നേടിയവർക്കും ഗ്രൂപ്പ് ഇനങ്ങളിൽ ഒന്നും രണ്ടും മൂന്നും സ്ഥാനങ്ങൾ നേടിയവർക്കും നവംബർ 01 ന്  ചെൽറ്റൻഹാമിൽ നടക്കുന്ന  യുക്മ ദേശീയകാലാമേളയിൽ പങ്കെടുക്കുവാനുള്ള അവസരം ലഭിക്കുന്നതാണ്.