'എല്ലാ ആഴ്ചകളിലും ഇത് തുടർന്നാൽ പ്രതിരോധിക്കാനാവില്ല, സ്‌പാനിഷ് ലീ​ഗ് വംശീയ വാദികളുടേത്': വിനീഷ്യസ് ജൂനിയർ

മാഡ്രിഡ്: വംശീയാധിക്ഷേപം നേരിട്ടതിന് പിന്നാലെ സ്‌പാനിഷ് ലീ​ഗിനെതിരെ കടുത്ത വിമർശനവുമായി റയൽ മാഡ്രിഡിന്റെ ബ്രസീലിയൻ താരം വിനീഷ്യസ് ജൂനിയർ. ഒരുകാലത്ത് മികച്ച കളിക്കാരുടേതായിരുന്ന സ്‌പാനിഷ് ലീ​ഗ് ഇപ്പോൾ വംശീയവാദികളുടെതാണെന്നും വംശീയവാദികൾക്കെതിരെ താൻ അവസാനം വരെ പോരാടുമെന്നും വിനീഷ്യസ് ജൂനിയർ പറഞ്ഞു. ട്വിറ്ററിലൂടെയായിരുന്നു അദ്ദേഹത്തിന്റെ പ്രതികരണം.

ലീ​ഗ് മത്സരത്തിനിടെ നിരവധി തവണ വംശീയാധിക്ഷേപം നേരിടേണ്ടി വന്ന താരമാണ് വിനീഷ്യസ് ജൂനിയർ. ഒടുവിൽ നടന്ന വലൻസിയ റയൽ മത്സരത്തിനിടെ വീണ്ടും അധിക്ഷേപമുണ്ടായതോടെയാണ് താരം ശക്തമായി പ്രതികരിച്ച് രം​ഗത്തെത്തിയത്. സ്റ്റേഡിയത്തിലുണ്ടായിരുന്ന കാണികളിൽ പലരും വിനീഷ്യസിനെ വംശീയമായി അധിക്ഷേപിച്ചിരിന്നു. ഇതിനെതിരെ റഫറിയോട് പരാതിപ്പെടുകയും തുടർന്ന് മത്സരം 10 മിനിറ്റോളം നിർത്തിവെക്കുകയുമായിരുന്നു. എന്നാൽ കളി തുടർന്നെങ്കിലും കുറച്ചു സമയത്തിനുള്ളിൽ ചുവപ്പുകാർഡ് കണ്ട് വിനീഷ്യസ് പുറത്തുപോയി. മത്സരം കഴിഞ്ഞപ്പോൾ വിനീഷ്യസ് ഇതുസംബന്ധിച്ച പ്രതികരണവുമായി രം​ഗത്തെത്തി.

"ലാ ലി​ഗയിൽ വംശീയാധിക്ഷേപം നേരിടുന്നത് ഒറ്റപ്പെട്ട സംഭവമല്ല. ഫെഡറേഷനും അങ്ങനെ തന്നെയാണ് ഈ വിഷയത്തെ കാണുന്നതും. എതിരാളികൾ ഇതിനെ പ്രോത്സാഹിപ്പിക്കുകയും ചെയ്യുന്നു. എല്ലാ ആഴ്ചകളിലും ഇത്തരത്തിൽ അധിക്ഷേപമുണ്ടായാൽ എനിക്കത് ചെറുക്കാനാവില്ല. പക്ഷേ വംശീയവാദികൾക്കെതിരെ ഞാൻ അവസാനം വരെ പോരാടും"- വിനീഷ്യസ് ട്വിറ്ററിൽ കുറിച്ചു.

Não foi a primeira vez, nem a segunda e nem a terceira. O racismo é o normal na La Liga. A competição acha normal, a Federação também e os adversários incentivam. Lamento muito. O campeonato que já foi de Ronaldinho, Ronaldo, Cristiano e Messi hoje é dos racistas. Uma nação…

— Vini Jr. (@vinijr) May 21, 2023

വിനീഷ്യസിന് പിന്തുണയുമായി ബ്രസീൽ പ്രസിഡന്റ് ലുല ഡാ സിൽവ, മുൻ ബ്രസീൽ താരം റൊണാൾഡോ തുടങ്ങിയവരും രം​ഗത്തെത്തിയിരുന്നു. എന്നാൽ വംശീയാധിക്ഷേപത്തെ കുറിച്ച് സംസാരിക്കാൻ ആ​ഗ്രഹിക്കുന്നില്ലെന്നായിരുന്നു സംഭവശേഷം റയൽ മാനേജർ ആഞ്ചെലോട്ടിയുടെ പ്രതികരണം. അതേസമയം, വിനീഷ്യസ് സ്പാനിഷ് ലീ​ഗിനെ അപമാനിച്ചുവെന്ന് ലാ ലി​ഗ പ്രസിഡന്റ് ഹാവിയർ ടെബസ് പറഞ്ഞു.