എസിസി മെന്‍സ്‌ ടി20 എമർജിംഗ് ടീംസ് ഏഷ്യാ കപ്പ്: ഇന്ത്യ എ ടീമിനെ പ്രഖ്യാപിച്ചു, തിലക് വര്‍മ ക്യാപ്റ്റന്‍; ടീമില്‍ അഭിഷേക് ശര്‍മ, രാഹുല്‍ ചഹര്‍ ഉള്‍പ്പെടെയുള്ള താരങ്ങളും

മുംബൈ: ഒക്ടോബർ 18 മുതൽ 27 വരെ ഒമാനിൽ നടക്കുന്ന എസിസി മെന്‍സ്‌ ടി20 എമർജിംഗ് ടീംസ് ഏഷ്യാ കപ്പ് മത്സരത്തിനുള്ള 15 അംഗ ഇന്ത്യ 'എ' ടീമിനെ തിരഞ്ഞെടുത്തു. തിലക് വര്‍മയാണ് ക്യാപ്റ്റന്‍. അഭിഷേക് ശർമ്മ, ആർ. സായ് കിഷോർ, രാഹുൽ ചാഹർ തുടങ്ങിയവര്‍ ടീമിലുണ്ട്.

ഇന്ത്യന്‍ എ ടീം: തിലക് വർമ്മ (ക്യാപ്റ്റൻ), അഭിഷേക് ശർമ്മ, ആയുഷ് ബഡോണി, നിഷാന്ത് സിന്ധു, രമൺദീപ് സിംഗ്, അനുജ് റാവത്ത്, പ്രഭ്‌സിമ്രാൻ സിംഗ്, നെഹാൽ വധേര, അൻഷുൽ കംബോജ്, ഹൃത്വിക് ഷോക്കീൻ, ആഖിബ് ഖാൻ, വൈഭവ് അറോറ, റാസിഖ് സലാം, സായ് കിഷോർ, രാഹുൽ ചാഹർ.

നാല് ടീമുകളെ രണ്ട് ഗ്രൂപ്പുകളായി തിരിച്ച് എട്ട് ടീമുകൾ ടൂർണമെൻ്റിൽ പങ്കെടുക്കും. മസ്കത്തിലെ ഒമാൻ ക്രിക്കറ്റ് അക്കാദമി ഗ്രൗണ്ടിലാണ് എല്ലാ മത്സരങ്ങളും നടക്കുക.ഗ്രൂപ്പ് ബിയില്‍ പാക്കിസ്ഥാൻ ഷഹീൻസ്, ഒമാൻ, യുഎഇ എന്നിവർക്കൊപ്പമാണ് ഇന്ത്യ ‘എ’. അഫ്ഗാനിസ്ഥാൻ ‘എ’, ബംഗ്ലാദേശ് ‘എ’, ഹോങ്കോംഗ്, ശ്രീലങ്ക ‘എ’ എന്നിവരടങ്ങുന്നതാണ്‌ ഗ്രൂപ്പ് എ.

ഒക്ടോബർ 19 ന് പാകിസ്ഥാൻ ഷഹീൻസിനെതിരെ ഇന്ത്യ 'എ' ആദ്യ മത്സരം കളിക്കും. തുടർന്ന് യഥാക്രമം ഒക്ടോബർ 21, 23 തീയതികളിൽ യുഎഇയെയും ഒമാനെയും നേരിടും. ഓരോ ഗ്രൂപ്പിലെയും ആദ്യ രണ്ട് ടീമുകൾ ഒക്ടോബർ 25 ന് നടക്കുന്ന സെമിഫൈനലിലേക്ക് യോഗ്യത നേടും. തുടർന്ന് ഒക്ടോബർ 27 ന് ഫൈനൽ നടക്കും.