ഗംഭീര്‍ വീണ്ടും കൊല്‍ക്കത്തയിലേക്ക്; ഉപദേശകനാകും

മുന്‍ ഇന്ത്യന്‍ ഓപ്പണര്‍ ഗൗതം ഗംഭീര്‍ കൊല്‍ക്കത്ത നൈറ്റ് റൈഡേഴ്‌സിന്റെ ഉപദേശകനാകും. ലഖ്നൗ സൂപ്പര്‍ ജയന്റ്സ് ടീമിന്റെ മെന്റര്‍ സ്ഥാനം ഉപേക്ഷിച്ചാണ് താരത്തിന്റെ കെകെആറിലേക്കുള്ള മടങ്ങിവരവ്.  ഐപിഎല്‍ 2023 അവസാനിച്ചതിന് പിന്നാലെ താരം ഷാരൂഖ് ഖാനുമായി കൂടിക്കാഴ്ച നടത്തിരുന്നു. ഇതോടെ ഒരിക്കല്‍ താന്‍ ഐപിഎല്‍ ചാമ്പ്യനാക്കിയ ടീമിലേക്ക് ഗംഭീര്‍ തിരിച്ചെത്തിയേക്കുമെന്ന ഊഹാപോഹങ്ങള്‍ പ്രചരിച്ചിരുന്നു. 

കെകെആര്‍ സിഇഒ വെങ്കി മൈസൂറാണ് ഗംഭീര്‍ കെകെആറിലേക്ക് ഒരു 'ഉപദേശകനായി' മടങ്ങിയെത്തുമെന്നും ഹെഡ് കോച്ച് ചന്ദ്രകാന്ത് പണ്ഡിറ്റുമായി അടുത്ത് പ്രവര്‍ത്തിക്കുമെന്നും ഔദ്യോഗികമായി അറിയിച്ചത്. ഇതിന് പിന്നാലെ ലഖ്നൗ സൂപ്പര്‍ ജയന്റ്സ് താരങ്ങള്‍ക്കും ആരാധകര്‍ക്കുമായി താരം ഒരു പോസ്റ്റ് പങ്കുവെച്ചു. വളരെ വൈകാരികമായി എഴുതിയ കുറിപ്പിലൂടെ അദ്ദേഹം താരങ്ങള്‍ക്ക് നന്ദിയും ആശംസയും അറിയിച്ചു. 

'ലഖ്നൗ താരങ്ങള്‍, പരിശീലകര്‍, സപ്പോര്‍ട്ട് സ്റ്റാഫ്, ടീമുമായി ബന്ധപ്പെട്ട എല്ലാവരില്‍ നിന്നും എനിക്ക് പിന്തുണ ലഭിച്ചു.ഡോ. സഞ്ജീവ് ഗോയങ്കയ്ക്ക് (ലഖ്നൗ ടീമിന്റെ ഉടമ) നന്ദി പറയാന്‍ ഞാന്‍ ആഗ്രഹിക്കുന്നു.ഗോയങ്കയുടെ നേതൃത്വം മികച്ചതായിരുന്നു, ഭാവിയിലും ലഖ്നൗ ടീം മികച്ച പ്രകടനം കാഴ്ചവെക്കുമെന്ന് ഞാന്‍ പ്രതീക്ഷിക്കുന്നു. ഇത് എല്‍എസ്ജി ആരാധകര്‍ക്ക് അഭിമാനം പകരും.ടീമിന് എല്ലാ ആശംസകളും നേരുന്നു.', താരം എക്‌സില്‍ കുറിച്ചു. 

നേരത്തെ മുൻ സിംബാബ്‌വെ താരം ആൻ‌ഡി ഫ്ലവറിനെ മുഖ്യ പരിശീലകനായി റോയൽ ചലഞ്ചേഴ്‌സ് ബാംഗ്ലൂർ നിയമിച്ചിരുന്നു. സഞ്ജയ് ബംഗറായിരുന്നു ആർസിബിയുടെ കോച്ച്. എന്നാൽ കഴിഞ്ഞ സീസണിലെ പ്രകടനവും മെച്ചപ്പെട്ടതല്ലാത്ത സാഹചര്യത്തിലാണ് ആർസിബി വമ്പൻ മാറ്റത്തിന് മുതിരുന്നത്. ബാംഗറിന് പുറമെ ഡയറക്‌ടർ ഓഫ് ക്രിക്കറ്റ് ഓപ്പറേഷൻസ് അയി പ്രവർത്തിച്ചിരുന്ന മൈക്ക് ഹെസനും സ്ഥാനം ഒഴിയും.

"ഐസിസി ഹാൾ ഓഫ് ഫേമും ടി20 ലോകകപ്പ് ജേതാവായ ആൻഡി ഫ്ലവറിനെ ആർസിബി പുരുഷ ടീമിന്റെ ഹെഡ് കോച്ചായി സ്വാഗതം ചെയ്യുന്നതിൽ ഞങ്ങൾക്ക് അതിയായ സന്തോഷമുണ്ട്" ആർസിബി പ്രസ്‌താവനയിൽ പറഞ്ഞു.

കഴിഞ്ഞ രണ്ട് വർഷമായി ലഖ്‌നൗ സൂപ്പർ ജയന്റ്‌സിനൊപ്പം പ്രവർത്തിച്ചതിന് ശേഷമാണ് ആൻഡി ഫ്ലവർ ഐപിഎല്ലിൽ ബെംഗളൂരുവിൽ ഇടം കണ്ടെത്തുന്നത്. 2022ൽ ഫ്രാഞ്ചൈസി അരങ്ങേറ്റം കുറിച്ചപ്പോൾ മുതൽ ഫ്ലവറായിരുന്നു കോച്ച്. 

ടീമിന്റെ ഉപദേഷ്‌ടാവ് ഗൗതം ഗംഭീർ, ക്യാപ്റ്റൻ കെഎൽ രാഹുൽ എന്നിവരുമായി അടുത്ത് പ്രവർത്തിക്കുകയും ആദ്യ രണ്ട് സീസണുകളിൽ ടീമിനെ പ്ലേ ഓഫിലേക്ക് നയിക്കുകയും ചെയ്‌തു. ജൂലൈയിൽ ഫ്ലവറുമായി വേർപിരിഞ്ഞതിന് ശേഷം ഓസ്‌ട്രേലിയൻ ഇതിഹാസം ജസ്‌റ്റിൻ ലാംഗറിനെ ടീമിന്റെ മുഖ്യ പരിശീലകനായി നിയമിച്ചിരുന്നു.