ടി20 ലോകകപ്പ്: ബംഗ്ലാദേശിന് പകരം സ്കോട്ട്‌ലൻഡ് കളിക്കും; അന്താരാഷ്ട്ര സമിതിയെ ഔദ്യോഗികമായി വിവരമറിയിക്കുന്നതിന് മുമ്പ് ബിസിബി ധാക്കയിൽ വാർത്താ സമ്മേളനം നടത്തിയത് ചട്ടലംഘനം. ബം​ഗ്ലാദേശിനെതിരെ നടപടി കടുപ്പിച്ച് ഐസിസി

ഹൈദരാബാദ്: അടുത്ത മാസം ആരംഭിക്കുന്ന ടി20 ലോകകപ്പിൽ ബംഗ്ലാദേശിന് പകരം സ്കോട്ട്‌ലൻഡ് പങ്കെടുക്കുമെന്ന് അന്താരാഷ്ട്ര ക്രിക്കറ്റ് കൗൺസിൽ അറിയിച്ചു. 

ഇന്ത്യൻ പ്രീമിയർ ലീഗ് ഫ്രാഞ്ചൈസിയായ കൊൽക്കത്ത നൈറ്റ് റൈഡേഴ്‌സ് മുസ്തഫിസുർ റഹ്മാനെ ടീമിൽ നിന്ന് ഒഴിവാക്കിയതിന് പിന്നാലെ, സുരക്ഷാ കാരണങ്ങൾ ചൂണ്ടിക്കാട്ടി ഇന്ത്യയിൽ കളിക്കാൻ ബംഗ്ലാദേശ് വിസമ്മതിച്ചതാണ് ഈ മാറ്റത്തിന് കാരണം.

അന്താരാഷ്ട്ര സമിതിയെ ഔദ്യോഗികമായി വിവരമറിയിക്കുന്നതിന് മുമ്പ് ബിസിബി ധാക്കയിൽ വാർത്താ സമ്മേളനം നടത്തിയത് ചട്ടലംഘനമാണെന്ന് ഐസിസി വ്യക്തമാക്കി.

മുംബൈയിലും കൊൽക്കത്തയിലുമായി നിശ്ചയിച്ചിരുന്ന മത്സരങ്ങൾ സുരക്ഷാ പ്രശ്നങ്ങൾ പറഞ്ഞ് മാറ്റണമെന്ന് ബംഗ്ലാദേശ് ആവശ്യപ്പെട്ടിരുന്നു. 

എന്നാൽ ഐസിസി നടത്തിയ പരിശോധനയിൽ ഇന്ത്യയിൽ കളിക്കുന്നതിൽ യാതൊരുവിധ സുരക്ഷാ ഭീഷണിയുമില്ലെന്ന് കണ്ടെത്തിയിരുന്നു. ഇന്ത്യയിൽ കളിച്ചില്ലെങ്കിൽ പോയിന്റുകൾ നഷ്ടപ്പെടുമെന്ന് ഐസിസി മുന്നറിയിപ്പ് നൽകിയിട്ടും ബംഗ്ലാദേശ് നിലപാടിൽ ഉറച്ചുനിന്നു.