കര്‍ണാടകയില്‍ വമ്പന്‍ പദ്ധതിയുമായി മുത്തയ്യ മുരളീധരന്‍; ശ്രീലങ്കന്‍ ഇതിഹാസത്തിന്റെ നീക്കം 1400 കോടി രൂപയുടെ വ്യവസായ യൂണിറ്റ് സ്ഥാപിക്കാന്‍ !

ബെംഗളൂരു: മുൻ ശ്രീലങ്കൻ ക്രിക്കറ്റ് താരം മുത്തയ്യ മുരളീധരൻ കര്‍ണാടകയില്‍ ബിവറേജസ് ആൻഡ് മിഠായി യൂണിറ്റ് സ്ഥാപിക്കാൻ 1400 കോടി രൂപ നിക്ഷേപിക്കുമെന്ന് റിപ്പോര്‍ട്ട്. ചാമരാജനഗർ ജില്ലയിലെ ബദനഗുപ്പെയിലാണ് പദ്ധതി വരുന്നത്. കര്‍ണാടക വൻകിട, ഇടത്തരം വ്യവസായ മന്ത്രി എം ബി പാട്ടീലാണ് ഇക്കാര്യം വ്യക്തമാക്കിയത്.

മുരളീധരനുമായി പാട്ടീൽ ചർച്ച നടത്തിയതിന് ശേഷമാണ് പ്രഖ്യാപനം. "മുത്തയ്യ ബിവറേജസ് ആൻഡ് കൺഫെക്ഷനറികൾ" എന്ന ബ്രാൻഡിന് കീഴിലാണ് പാനീയങ്ങളടക്കം നിര്‍മ്മിക്കുക.

230 കോടി രൂപ മുതൽമുടക്കിലാണ് പദ്ധതി ആദ്യം ആസൂത്രണം ചെയ്തിരുന്നത്. എന്നാൽ ബജറ്റ് 1,400 കോടി രൂപയായി പരിഷ്കരിച്ചു. ഏതാനും വർഷങ്ങൾക്കുള്ളിൽ ഇത് പൂർത്തിയാകുമെന്നും പാട്ടീൽ പറഞ്ഞു. പദ്ധതിക്കായി 46 ഏക്കർ ഭൂമി ഇതിനകം അനുവദിച്ചിട്ടുണ്ടെന്നും 2025 ജനുവരിയിൽ നിർമ്മാണ പ്രവർത്തനങ്ങൾ ആരംഭിക്കുമെന്നും മന്ത്രി പറഞ്ഞു.