ഐസിസി വനിതാ ടി20 റാങ്കിങിൽ ഇന്ത്യൻ ഓൾറൗണ്ടർ ദീപ്തി ശർമയ്ക്ക് ചരിത്ര നേട്ടം. കരിയറിലാദ്യമായി ബൗളര്‍മാരുടെ പട്ടികയില്‍ ഒന്നാം സ്ഥാനം

ദുബായ്: ഐസിസിയുടെ ഏറ്റവും പുതിയ വനിതാ ടി20 റാങ്കിങിൽ ഇന്ത്യൻ ഓൾറൗണ്ടർ ദീപ്തി ശർമയ്ക്ക് ചരിത്ര നേട്ടം. ബൗളർമാരുടെ പട്ടികയിൽ ഒന്നാം സ്ഥാനത്തെത്തി. കരിയറിൽ ആദ്യമായാണ് ദീപ്തി ടി20 ബൗളിങ് റാങ്കിങിൽ ഒന്നാം റാങ്ക് സ്വന്തമാക്കുന്നത്.

ശ്രീലങ്കക്കെതിരായ ടി20 പരമ്പരയിലെ മികച്ച പ്രകടനമാണ് ദീപ്തിക്ക് നിർണായകമായത്. ആദ്യ മത്സരത്തിൽ നാല് ഓവറിൽ 20 റൺസ് മാത്രം വഴങ്ങി ഒരു വിക്കറ്റ് സ്വന്തമാക്കിയ ദീപ്തിയുടെ റേറ്റിങ് പോയിന്റ് അഞ്ചായി ഉയർന്നു. ഇതോടെയാണ് ഓസ്‌ട്രേലിയൻ താരം അന്നബെൽ സതർലാൻഡിനെ ഒറ്റ പോയിന്റിന്റെ വ്യത്യാസത്തിൽ പിന്തള്ളിക്കൊണ്ട് ദീപ്തി ഒന്നാം സ്ഥാനത്തേക്ക് കുതിച്ചത്.

അതേസമയം, വനിതകളുടെ ഏകദിന ബാറ്റിങ് റാങ്കിങിൽ ഇന്ത്യയുടെ സ്മൃതി മന്ധാനയ്ക്ക് ഒന്നാം സ്ഥാനം നഷ്ടമായി. ദക്ഷിണാഫ്രിക്കൻ ക്യാപ്റ്റൻ ലോറ വോൾവാർട്ടാണ് പുതിയ ഒന്നാം സ്ഥാനക്കാരി. സ്മൃതി രണ്ടാം സ്ഥാനത്തേക്ക് പിന്തള്ളപ്പെട്ടു.

ഇന്ത്യൻ താരം ജെമിമ റോഡ്രിഗ്സും റാങ്കിങിൽ മുന്നേറ്റം നടത്തി. വനിതാ ടി20 ബാറ്റർമാരുടെ പട്ടികയിൽ അഞ്ചു സ്ഥാനങ്ങൾ മെച്ചപ്പെടുത്തി ജെമിമ ഒമ്പതാം സ്ഥാനത്തെത്തി. ശ്രീലങ്കക്കെതിരായ മത്സരത്തിൽ പുറത്താകാതെ നേടിയ അർധസെഞ്ച്വറിയാണ് താരത്തിന് റാങ്കിങ് ഉയരാൻ സഹായകമായത്. ആ മത്സരം ഇന്ത്യൻ വിജയത്തിൽ നിർണായകമായിരുന്നു.

ടി20 ബാറ്റർമാരുടെ പട്ടികയിൽ സ്മൃതി മന്ധാന മൂന്നാം സ്ഥാനത്ത് തുടരുമ്പോൾ, ഓപ്പണർ ഷെഫാലി വർമ്മ പത്താം സ്ഥാനത്തേക്ക് താഴ്ന്നു. ഇതോടെ ഇന്ത്യൻ വനിതാ ടീമിലെ താരങ്ങൾ വിവിധ വിഭാഗങ്ങളിലെ റാങ്കിങുകളിൽ ശ്രദ്ധേയമായ പ്രകടനം തുടരുന്നതായി ഐസിസി പട്ടിക വ്യക്തമാക്കുന്നു.