അർജൻ്റീന ഫുട്ബോൾ ടീം കേരളത്തിൽ നേരിടുക ഓസ്ട്രേലിയയെ

കൊച്ചി: കാത്തിരിപ്പിനും വിവാദങ്ങൾക്കുമൊടുവിൽ മെസി കേരളത്തിൽ എത്തുന്നു. അർജന്റീന ഫുട്ബോൾ ടീമിന്റെ കേരളത്തിലേയ്ക്കുള്ള വരവ് വൻ രാഷ്ട്രീയ കോലാഹലങ്ങൾക്കായിരുന്നു വഴിവെച്ചത്. നവംബറിൽ കേരളത്തിലെത്തുന്ന ടീം കൊച്ചിയിൽ ഓസ്‌ട്രേലിയയ്‌ക്കെതിരായ മത്സരം കളിക്കുമെന്ന് കായിക വകുപ്പിലെ ഔദ്യോഗിക വൃത്തങ്ങൾ അറിയിച്ചു.

സൗഹൃദ മത്സരത്തിന് തീയതി നിശ്ചയിച്ചിട്ടില്ല, എന്നാൽ നവംബർ 12 നും നവംബർ 18 നും ഇടയിൽ അർജന്റീന ടീമും മെസ്സിയും കേരളത്തിൽ ഉള്ള ഏത് ദിവസവും കൊച്ചിയിൽ അത് നടക്കുമെന്ന് വൃത്തങ്ങൾ പറഞ്ഞു.

അർജന്റീന ടീമിന്റെ കേരള സന്ദർശനവുമായി ബന്ധപ്പെട്ട് ചില വിവാദങ്ങൾ ഉണ്ടായിരുന്നു, ഈ വർഷം ഓഗസ്റ്റ് ആദ്യം ചില റിപ്പോർട്ടുകൾ മെസ്സിയും ദക്ഷിണ അമേരിക്കൻ ടീം സംസ്ഥാനത്ത് വരില്ലെന്ന് പറഞ്ഞിരുന്നു. എന്നിരുന്നാലും, അതേ മാസം അവസാനം, സംസ്ഥാന കായിക മന്ത്രി വി അബ്ദുറഹ്മാൻ നവംബറിൽ ടീം കേരളത്തിൽ എത്തുമെന്ന് അറിയിക്കുകയും ചെയ്തു.

അർജന്റീന ഫുട്ബോൾ അസോസിയേഷന്റെ കൂടി താൽപര്യം പരിഗണിച്ചായിരിക്കും എതിരാളികളെ തീരുമാനിക്കുക. സൗഹൃദ മത്സരം കളിക്കാൻ എതിരാളികളായി ഓസ്ട്രേലിയയും കോസ്റ്ററിക്കയും ആയിരുന്നു ആദ്യംമുതലേ പരിഗണനയിൽ. 

കഴിഞ്ഞ ലോകകപ്പിൽ അർജന്റീനയെ പ്രീക്വാർട്ടറിൽ നേരിട്ടത് ഓസ്ട്രേലിയയായിരുന്നു. ഒന്നിനെതിരെ രണ്ടു ഗോളുകൾക്ക് തോറ്റെങ്കിലും മികച്ച പോരാട്ടമായിരുന്നു ഓസ്ട്രേലിയയുടേത്. കേരളത്തിൽ അർജന്റീനയെ നേരിടാൻ ഓസ്ട്രേലിയയ്ക്കും താൽപര്യമുണ്ടെന്നാണു പുറത്തുവരുന്ന വിവരം.

കൊച്ചിയിലെ ജവഹർലാൽ നെഹ്‍റു സ്റ്റേ‍ഡിയത്തിലായിരിക്കും അർജന്റീന കളിക്കുക. രാജ്യാന്തര മത്സരത്തിനായി സ്റ്റേഡിയം സജ്ജീകരിക്കുന്നതിനായി ഒരുക്കങ്ങൾ ഉടൻ ആരംഭിക്കേണ്ടതുണ്ടെന്ന് കായിക മന്ത്രി വി. അബ്ദുറഹിമാൻ ജിസിഡിഎ ചെയർമാൻ കെ. ചന്ദ്രന്‍പിള്ളയ്ക്ക് എഴുതിയ കത്തിൽ വ്യക്തമാക്കി. നവംബർ രണ്ടാം വാരം മത്സരം നടത്താൻ ഉദ്ദേശിക്കുന്നുവെന്നാണു മന്ത്രി കത്തിൽ പറയുന്നത്.

കേരളത്തിലെ ഫിഫ നിലവാരമുള്ള ഏക ഫുട്ബോൾ ടർഫ് ആണ് കലൂർ സ്റ്റേഡിയത്തിലേത്. കേരള ബ്ലാസ്റ്റേഴ്സാണു സ്റ്റേഡിയം ടർഫ് പരിപാലിക്കുന്നത്.