41 വർഷത്തെ ഏഷ്യാ കപ്പ് ചരിത്രത്തിൽ ഇത് ആദ്യം; ഏവരും ആകാംക്ഷയോടെ ഉറ്റുനോക്കുന്ന ഇന്ത്യ-പാകിസ്ഥാൻ ഫൈനൽ പോരാട്ടം സെപ്റ്റംബർ 28ന്

മുംബൈ: 41 വർഷത്തെ ടൂർണമെൻ്റ് ചരിത്രത്തിൽ ആദ്യമായി ഏഷ്യാ കപ്പിന്റെ ഫൈനലിൽ ഇന്ത്യയും പാകിസ്ഥാനും ഏറ്റുമുട്ടാൻ ഒരുങ്ങുന്നു. 

ദുബായ് ഇൻ്റർനാഷണൽ ക്രിക്കറ്റ് സ്റ്റേഡിയത്തിൽ നടന്ന തങ്ങളുടെ അവസാന സൂപ്പർ 4 മത്സരത്തിൽ ബംഗ്ലാദേശിനെതിരെ 11 റൺസിന് വിജയിച്ചാണ് പാകിസ്ഥാൻ ഏഷ്യാ കപ്പ് 2025 ഫൈനലിൽ സ്ഥാനം ഉറപ്പിച്ചത്.

ഫാസ്റ്റ് ബൗളർമാരായ ഷഹീൻ അഫ്രീദി (3/17), ഹാരിസ് റൗഫ് (3/33) എന്നിവർ ചേർന്ന് ബംഗ്ലാദേശിനെ 124/9 എന്ന നിലയിൽ ഒതുക്കി. 135/8 എന്ന ചെറിയ ടോട്ടൽ വിജയകരമായി പ്രതിരോധിക്കാൻ ഈ താരങ്ങളുടെ പ്രകടനം പാകിസ്ഥാനെ സഹായിച്ചു.

ഇതോടെ, , സെപ്റ്റംബർ 28 ന് നടക്കുന്ന ഫൈനൽ ഉൾപ്പെടെ ഈ ടൂർണമെൻ്റിലെ ഇന്ത്യയുമായുള്ള തങ്ങളുടെ മൂന്നാമത്തെ പോരാട്ടത്തിന് പാകിസ്ഥാൻ തയ്യാറെടുക്കുകയാണ്. മൂന്നിലധികം ടീമുകൾ പങ്കെടുത്ത മൾട്ടിനാഷണൽ ടൂർണമെൻ്റുകളുടെ ചരിത്രത്തിൽ ഇന്ത്യയും പാകിസ്ഥാനും അഞ്ച് തവണ ഫൈനലിൽ ഏറ്റുമുട്ടിയിട്ടുണ്ട്.

ഈ അഞ്ച് ഫൈനലുകളിൽ മൂന്ന് തവണയും പാകിസ്ഥാൻ ഇന്ത്യയെ മറികടന്നു. ഇരു ടീമുകളും ആദ്യമായി ഒരു ടൂർണമെൻ്റ് ഫൈനലിൽ ഏറ്റുമുട്ടിയത് 1985-ലെ വേൾഡ് ചാമ്പ്യൻഷിപ്പ് ഓഫ് ക്രിക്കറ്റിൻ്റെ ഫൈനലിലാണ്. അന്ന് എട്ട് വിക്കറ്റിന് ഇന്ത്യ വിജയിച്ചു.

അതേസമയം, അവസാനമായി ഒരു ഫൈനലിൽ അവർ ഏറ്റുമുട്ടിയത് 2017-ലെ ചാമ്പ്യൻസ് ട്രോഫിയിലാണ്. അന്ന് 180 റൺസിന് ഇന്ത്യയെ ഞെട്ടിച്ച് പാകിസ്ഥാൻ വിജയം സ്വന്തമാക്കി.