‘റോക്കട്രി: ദ് നമ്പി ഇഫക്ട്’; അതിഥി വേഷത്തില്‍ ഷാരൂഖ് ഖാനും സൂര്യയും

നമ്പി നാരായണന്റെ ജീവിതം പറയുന്ന ചിത്രമാണ് ‘റോക്കട്രി: ദ് നമ്പി ഇഫക്ട്’. ചിത്രത്തില്‍ മാധവനാണ് നമ്പി നാരായണനായി വെള്ളിത്തിരയില്‍ എത്തുന്നത്. ഇപ്പോഴിതാ ചിത്രത്തില്‍ ഷാരൂഖ് ഖാനും സൂര്യയും എത്തുന്നു എന്നു റിപ്പോര്‍ട്ടുകള്‍ പുറത്തുവരുന്നുണ്ട്. അതിഥി വേഷത്തിലായിരിക്കും ഇരുവരും ചിത്രത്തിലെത്തുക. ചിത്രത്തിന്റെ ഹിന്ദി റീമേക്കിലായിരിക്കും ഷാരൂഖ് ഖാന്‍ അഭിനയിക്കുക. തമിഴില്‍ ഈ റോള്‍ സൂര്യ ആയിരിക്കും അവതരിപ്പിക്കുക. റോക്കട്രി: ദ് നമ്പി ഇഫക്ട് എന്ന ചിത്രത്തിന്റെ ഭാഗമാകാനുള്ള ആഗ്രഹം നേരത്തെയും സൂര്യ പ്രകടിപ്പിച്ചിരുന്നു.

അതേസമയം ചിത്രത്തില്‍ നായികാ കഥാപാത്രം ഉണ്ടായിരിക്കില്ലെന്ന് മാധവന്‍ നേരത്തെ വെളിപ്പെടുത്തിയിരുന്നു. ഒരു സ്വകാര്യ മാധ്യമത്തിന് നല്‍കിയ അഭിമുഖത്തിലാണ് ചിത്രത്തില്‍ നായിക കഥാപാത്രം ഉണ്ടായിരിക്കില്ലെന്ന് മാധവന്‍ വ്യക്തമാക്കിയത്. ‘റോക്കട്രി: ദ് നമ്പി ഇഫക്ട്’ എന്ന സിനിമയുടെ സഹസംവിധായകന്‍ കൂടിയാണ് മാധവന്‍.

ആനന്ദ് മോഹനാണ് റോക്കട്രി: ദ് നമ്പി ഇഫക്ട്’ എന്ന ചിത്രത്തിന്റെ സംവിധാനം നിര്‍വ്വഹിക്കുന്നത്. തമിഴ്, തെലുങ്ക്, ഹിന്ദി ഭാഷകളില്‍ ചിത്രം പുറത്തിറങ്ങും. നമ്പി നാരായണന്‍ രചിച്ച ‘റെഡി ടു ഫയര്‍: ഹൗ ഇന്ത്യ ആന്‍ഡ് ഐ സര്‍വൈവ്ഡ് ദ് ഐഎസ്ആര്‍ഒ സ്‌പൈ കേസ്’ എന്ന പുസ്തകത്തെ ആധാരമാക്കിയാണ് സിനിമ നിര്‍മ്മിക്കുന്നത്.