എല്ലാ ക്യൂ ആർ കോഡുകളെയും കണ്ണടച്ച് വിശ്വസിക്കരുതേ... ക്യൂആർ കോഡുകൾ സ്കാൻ ചെയ്യുന്നതിന് മുമ്പ് മുമ്പ് കേരള പൊലീസ് നൽകുന്ന ഈ നിർദേശങ്ങൾ അറിഞ്ഞിരിക്കാം

കൊച്ചി :  ക്യൂ ആർ കോഡുകൾ ഇന്ന് നിത്യ ജീവിതത്തിന്റെ ഭാഗമാണ്. എന്നാൽ  എല്ലാ ക്യൂ ആർ കോഡുകയും കണ്ണടച്ച് വിശ്വസിക്കാൻ സാധിക്കില്ല. നിങ്ങളുടെ ഫോണിലെ ഡേറ്റ സുരക്ഷിതമായിരിക്കാൻ ക്യൂ ആർ കോഡ് സ്കാൻ ചെയ്യുന്നതിന് മുമ്പ് കേരള പൊലീസ് നൽകിയിരിക്കുന്ന ഈ നിർദേശങ്ങൾ ഓർമയിൽ സൂക്ഷിക്കുക.

ഫേസ്ബുക്ക് പോസ്റ്റ്

ആധുനികജീവിതത്തിൽ QR കോഡുകളുടെ സ്ഥാനം ഒഴിവാക്കാനാവാത്ത വിധം മാറിക്കഴിഞ്ഞു. QR കോഡുകൾ സ്കാൻ ചെയ്യുമ്പോൾ അറിഞ്ഞിരിക്കേണ്ട ചില വസ്തുതകൾ ഉണ്ട്.

 ക്യൂ ആർ  കോഡ് ഉപയോഗിച്ച് ഒരു ലിങ്ക് തുറക്കുമ്പോൾ, URL സുരക്ഷിതമാണെന്നും വിശ്വസനീയമായ ഉറവിടത്തിൽ നിന്നാണ് വരുന്നതെന്നും ഉറപ്പാക്കേണ്ടത് പ്രധാനമാണ്.

ഇമെയിലിലെയും SMS ലെ യും സംശയകരമായ ലിങ്കുകൾ ക്ലിക്കുചെയ്യുന്നത് അപകടകരമെന്നതുപോലെ QR കോഡുകൾ നയിക്കുന്ന URL-കൾ എല്ലാം ശരിയാകണമെന്നില്ല. ഫിഷിംഗ് വെബ്‌സൈറ്റിലേക്ക് നിങ്ങളെ കൊണ്ടുപോകാൻ അതിനു കഴിഞ്ഞേക്കും.

 ക്യൂ ആർകോഡ് സ്കാനർ APP- സെറ്റിംഗ്സിൽ “open URLs automatically’ എന്ന ഓപ്ഷൻ നമ്മുടെ യുക്താനുസരണം സെറ്റ് ചെയ്യാം. നമ്മുടെ അറിവോടെ വെബ്‌സൈറ്റുകളിൽ പ്രവേശിക്കാനുള്ള അനുമതി നൽകുന്നതാണ് ഉചിതം.
അറിയപ്പെടുന്ന സേവന ദാതാക്കളിൽ നിന്ന് മാത്രം ക്യൂ ആർകോഡ് ജനറേറ്റ് ചെയ്യുക.

 ക്യൂ ആർ  കോഡ് ഉപയോഗിച്ചുള്ള ഇടപാടുകൾ നടത്തിയ ഉടനെ അക്കൗണ്ടിലെ ട്രാൻസാക്ഷൻ വിശദാംശങ്ങൾ പരിശോധിച്ച് ഉറപ്പുവരുത്തുക.

കസ്റ്റം  ക്യൂ ആർ കോഡ് ആപ്പുകൾ ഡൗൺലോഡ് ചെയ്യുന്നത് ഒഴിവാക്കുക.

 ക്യൂ ആർ കോഡ് സ്കാൻ ചെയ്യാൻ കഴിയുന്നതും ഉപകരണ നിർമ്മാതാവ് നൽകുന്ന വിശ്വസനീയമായ ആപ്പുകൾ ഉപയോഗിക്കുക.

ഏതൊരു ടെക്നോളജിക്കും ഗുണത്തിനൊപ്പം ചില ദൂഷ്യവശങ്ങൾ കൂടിയുണ്ടെന്ന് മനസിലാക്കുന്നത് കൂടുതൽ കരുതലോടെ ഇവയെ സമീപിക്കാൻ സഹായിക്കും.