ഇന്ത്യയിലെ എഐ ഹബ്ബിൽ ഗൂഗിൾ 15 ബില്യൺ ഡോളർ നിക്ഷേപിക്കുമെന്ന് പ്രധാനമന്ത്രി മോദിയെ അറിയിച്ച് സുന്ദർ പിച്ചൈ

ഇന്ത്യയിലെ എഐ ഹബ്ബിൽ ഗൂഗിൾ 15 ബില്യൺ ഡോളർ നിക്ഷേപിക്കുമെന്ന് സുന്ദർ പിച്ചൈ പ്രധാനമന്ത്രി മോദിയെ  അറിയിച്ചു.

വിശാഖപട്ടണത്ത് ഒരു ഭീമൻ ഡാറ്റാ സെന്ററും ആർട്ടിഫിഷ്യൽ ഇന്റലിജൻസ് ബേസും പ്രഖ്യാപിച്ചുകൊണ്ട്, അടുത്ത അഞ്ച് വർഷത്തിനുള്ളിൽ ഇന്ത്യയിൽ 15 ബില്യൺ ഡോളർ നിക്ഷേപിക്കുമെന്ന് ഗൂഗിൾ അറിയിച്ചു.

ആന്ധ്രാപ്രദേശിലെ വിശാഖപട്ടണത്ത് തങ്ങളുടെ ആർട്ടിഫിഷ്യൽ ഇന്റലിജൻസ് ഹബ്ബിനായുള്ള യുഎസ് ടെക് ഭീമന്റെ പദ്ധതികളെക്കുറിച്ച് പ്രധാനമന്ത്രി നരേന്ദ്ര മോദിയുമായി സംസാരിച്ചതായും, രാജ്യത്തെ ഇതുവരെയുള്ള ഏറ്റവും വലിയ നിക്ഷേപമാണിതെന്നും ഗൂഗിൾ മേധാവി സുന്ദർ പിച്ചൈ ചൊവ്വാഴ്ച പറഞ്ഞു .

യുഎസിന് പുറത്തുള്ള ഏറ്റവും വലിയ എഐ ഹബ്ബായ വിശാഖപട്ടണത്ത് ഒരു ഭീമൻ ഡാറ്റാ സെന്ററിനും ആർട്ടിഫിഷ്യൽ ഇന്റലിജൻസ് ബേസിനും വേണ്ടി ഗൂഗിൾ അദാനി ഗ്രൂപ്പുമായി പങ്കാളിത്തത്തിൽ ഏർപ്പെട്ടുകഴിഞ്ഞു. 

ഇതിനെ ഒരു "വികസനത്തിന്റെ നാഴികകല്ല് " എന്ന് വിശേഷിപ്പിച്ച ഇന്ത്യൻ വംശജനായ സിഇഒ, സുന്ദർ പിച്ചൈ  ഗിഗാവാട്ട്-സ്കെയിൽ കമ്പ്യൂട്ട് ശേഷി, ഒരു പുതിയ അന്താരാഷ്ട്ര സബ് സീ ഗേറ്റ്‌വേ, വലിയ തോതിലുള്ള ഊർജ്ജ അടിസ്ഥാന സൗകര്യങ്ങൾ എന്നിവ സംയോജിപ്പിച്ച് ഹബ് നിർമ്മിച്ചതായി പറഞ്ഞു.

"ഇതിലൂടെ ഞങ്ങളുടെ വ്യവസായ പ്രമുഖ സാങ്കേതികവിദ്യ ഇന്ത്യയിലെ സംരംഭങ്ങളിലേക്കും ഉപയോക്താക്കളിലേക്കും എത്തിക്കുകയും എ.ഐ നവീകരണം ത്വരിതപ്പെടുത്തുകയും രാജ്യത്തുടനീളമുള്ള വളർച്ചയ്ക്ക് വഴിയൊരുക്കുകയും ചെയ്യും," പിച്ചൈ എക്‌സിൽ പോസ്റ്റ് ചെയ്തു.

വിശാഖപട്ടണത്ത് ഗൂഗിൾ എഐ ഹബ് ആരംഭിച്ചതിൽ താൻ "ആഹ്ലാദിക്കുന്നു" എന്നായിരുന്നു  പ്രധാനമന്ത്രി നരേന്ദ്ര മോദിയുടെ മറുപടി.