എസ്.എസ്.എൽ.സിയിൽ നൂറ്മേനി വിജയവുമായി താനൂർ എഡ്യുവില്ല

തിരൂർ : എസ്.ഐ.ഒ മലപ്പുറം ജില്ലാ കമ്മിറ്റിയുടെ ആഭിമുഖ്യത്തിൽ താനൂർ കോർമ്മൻ കടപ്പുറത്ത് രൂപീകരിക്കപ്പെട്ട എഡ്യുവില്ല വിദ്യാഭ്യാസ പദ്ധതിയുടെ ഭാഗമായി പത്താം ക്ലാസ് വിദ്യാർത്ഥികൾക്കായാരംഭിച്ച സൗജന്യ ട്യൂഷൻ സെന്ററിലെ ആദ്യ ബാച്ച് നൂറ് ശതമാനം വിജയത്തോടു കൂടി എസ്.എസ്.എൽ.സി പൂർത്തിയാക്കി.

മലപ്പുറം ജില്ലയിലെ തീരദേശ വിദ്യാർത്ഥികളുടെ വിദ്യാഭ്യാസപരവും സാമൂഹൃവുമായ ഉയർച്ച ലക്ഷ്യം വെച്ച് കൊണ്ടാണ് എജ്യൂവില്ല പദ്ധതി രൂപീകരിക്കപ്പെടുന്നത്. താനൂർ കോർമ്മൻ കടപ്പുറത്ത് 2019 നവംബർ 17ന് വ്യത്യസ്ഥ മത-രാഷ്ട്രീയ- സമുദായ നേതാക്കളുടെ സാന്നിദ്ധ്യത്തിൽ ബഹുമാന്യനായ ജമാഅത്തെ ഇസ്‌ലാമി ഹിന്ദ് സെക്രട്ടറി ജനറൽ ടി.ആരിഫലിയാണ് ഉദ്ഘാടനം നിർവ്വഹിച്ചത്.

പദ്ധതിയുടെ ആദ്യഘട്ടമെന്ന നിലയിൽ ആരംഭിച്ച സൗജന്യ ട്യൂഷൻ സെന്ററിൽ അറുപതോളം വിദ്യാർത്ഥികൾ പഠിതാക്കളായിരുന്നു. ഈ കാലയളവിൽ പ്രൊജക്റ്റിന്റെ ഭാഗമായി കുട്ടികൾക്കും രക്ഷിതാക്കൾക്കുമായി പാരറ്റിംഗ് & ഗൈഡൻസ്, മോട്ടിവേഷണൽ & പേഴ്സണാലിറ്റി ക്ലാസുകൾ, എസ്.എസ്.എൽ.സി പരീക്ഷക്കു മുന്നോടിയായി പരീക്ഷ മുന്നൊരുക്ക ട്രെയ്നിംങ്ങ് പ്രോഗ്രാമുകളും നൽകിയിരുന്നു.

എസ്.ഐ.ഒ. മലപ്പുറം ജില്ലാ വൈസ് പ്രസിഡന്റ് ബാസിത് താനൂർ, എഡ്യുക്കേഷൻ - എച്ച്.ആർ കൺവീനർ ഷബീർ മലപ്പുറം എന്നിവരാണ് എഡ്യുവില്ലക്ക് നേതൃത്വം നൽകി വരുന്നത്. ഉന്നത വിജയം നേടിയവർക്ക് ജില്ലാ ജോയിന്റ് സെക്രട്ടറി വാഹിദ് ചുള്ളിപ്പാറ, എഡ്യുവില്ല കോഡിനേറ്റർ ജാഫർ കെ.പി. എന്നിവർ അനുമോദനങ്ങൾ നൽകി.ഉന്നത വിജയം നേടിയ വിദ്യാർത്ഥികൾ :(10 A+)ജഹറുന്നീസ, (9 A+) ഉമ്മു ആലിയ, സോനാ ജാസ്മിൻ, ഫെബിന ബാനു (8A+) മുഷ്ഫിറ.