ബ്രെഡ് പാക്കറ്റിൽ ഒളിപ്പിച്ച് എംഡിഎംഎ കടത്താൻ ശ്രമം; യുവാവ് പിടിയിൽ

പത്തനംതിട്ട: എംഡിഎംഎയുമായി ബെം​ഗളൂരുവിൽ നിന്ന് കേരളത്തിലെത്തിയ യുവാവ് പത്തനംതിട്ടയിൽ പിടിയിൽ. മൈലപ്ര സ്വദേശി മിഥുൻ രാജീവാണ് (24) അറസ്റ്റിലായത്. ഇയാളിൽ നിന്നും 9.61 ഗ്രാം എംഡിഎംഎയാണ് പിടിച്ചെടുത്തത്. ഡാൻസാഫ് ടീമിന്റെയും പൊലീസിന്റെയും സംയുക്ത പരിശോധനയിലാണ് പ്രതി അറസ്റ്റിലായത്.

പൊലീസിന് ലഭിച്ച രഹസ്യ വിവരത്തെ തുട‍ർന്ന് നടത്തിയ അന്വേഷണത്തിലാണ് പ്രതിയെ പിടികൂടിയത്. ബം​ഗളൂരുവിൽ നിന്ന് ആഴ്ചതോറും എംഡിഎംഎ കേരളത്തിലെത്തിച്ച് വിൽപ്പന നടത്തുന്ന സംഘത്തിലെ അംഗമാണ് മിഥുൻ എന്ന് പൊലീസ് പറഞ്ഞു. കഴിഞ്ഞ ഒന്നരമാസമായി മിഥുൻ ഡാൻസാഫിന്റെ നിരീക്ഷണത്തിലായിരുന്നു. യുവാവിനെ കൂടാതെ സംഘത്തിലെ മറ്റു പ്രതികളൾക്കായി അന്വേഷണം തുടരുകയാണെന്നും പൊലീസ് പറഞ്ഞു

പ്രതിയുടെ മൊബൈൽ ടവർ ലൊക്കേഷൻ പൊലീസ് നിരന്തരം നിരീക്ഷിച്ചിരുന്നു. അതിനിടയിലാണ് പ്രതി കഴിഞ്ഞ ദിവസം ബെം​ഗളൂരുവിലേക്ക് പോയത്. തിരിച്ചു വരുമ്പോൾ പിടികൂടാമെന്ന നിലയിൽ പ്രതിയെ പിന്തുടരുകയായിരുന്നു. ബെം​ഗളൂരുവിൽ നിന്നും ബസിനാണ് പ്രതി പത്തനംതിട്ടയിലേക്ക് യാത്ര ചെയ്തത്. വിവരം ലഭിച്ചതിനെ തുടർന്ന് റാന്നി മുതൽ ബസിനു പിന്നാലെ ഡാൻസാഫ് സംഘവും ഉണ്ടായിരുന്നു. മൈലപ്ര പള്ളിപ്പടിയിൽ ബസിറങ്ങിയ പ്രതിയെ പിടികൂടി.

പരിശോധനയിൽ നിന്നും പ്രതിയുടെ ബാഗിൽ നിന്നും ബ്രഡ് പായ്ക്കറ്റിനുള്ളിൽ ചെറിയ കവറുകളിലൊളിപ്പിച്ച 9.61 ഗ്രാം എംഡിഎംഎ പിടിച്ചെടുത്തു. ചോദ്യം ചെയ്യലിൽ സ്കൂൾ കോളേജ് വിദ്യാർത്ഥികളെ കേന്ദ്രീകരിച്ചാണ് എംഡിഎംഎ വിൽപ്പന നടത്തിയിരുന്നതെന്ന് പ്രതി മൊഴി നൽകി. അവധിക്കാലമായതോടെ കൂടുതൽ വിൽപ്പനയാണ് സംഘം ലക്ഷ്യമിട്ടിരുന്നതെന്ന് പൊലീസ് പറഞ്ഞു. നാർക്കോട്ടിക് ഡിവൈഎസ്പി കെ എ വിദ്യാധരന്റെയും പത്തനംതിട്ട ഡിവൈഎസ്പി എസ് നന്ദകുമാറിന്റെയും നേതൃത്വത്തിലുള്ള സംഘമാണ് പ്രതിയെ പിടികൂടിയത്.