മരത്തടി മുറിക്കുന്നതിനിടെ മെഷീൻവാൾ കൊണ്ട് കാലിന് പരുക്ക്; എസ്റ്റേറ്റ് സൂപ്രണ്ട് മരിച്ചു

കട്ടപ്പന: മരത്തടി മുറിക്കുന്നതിനിടെയുണ്ടായ അപകടത്തിൽ പരുക്കേറ്റ എസ്റ്റേറ്റ് സൂപ്രണ്ട് മരിച്ചു. വള്ളക്കടവ് ജ്യോതിനഗർ പുതിയാപറമ്പിൽ തോമസ് ജോസഫ് (45) ആണ് മരിച്ചത്. മെഷീൻവാൾ ഉപയോഗിച്ച് മരത്തടി മുറിക്കുന്നതിനിടെ തോമസിന്റെ കാലറ്റുപോയിരുന്നു. രാവിലെ പത്തരയോടെ ആയിരുന്നു അപകടം.മാലിക്കു സമീപമുള്ള സ്വകാര്യ ഏലത്തോട്ടത്തിലെ സൂപ്രണ്ടായി ജോലി ചെയ്യുകയായിരുന്നു തോമസ്.

മറ്റ് തൊഴിലാളികൾക്കൊപ്പമാണ് ഇദ്ദേഹം രാവിലെ പണിസ്ഥലത്ത് എത്തിയത്.മരത്തടി ഉപയോഗിച്ച് മുറിക്കുന്നതിനിടെ തെന്നിമാറിയ മെഷീൻവാൾ കൊണ്ട് തോമസിന്റെ ഇടതുകാൽ മുട്ടിനു മുകൾഭാഗത്തുവച്ച് മുറിയുകയായിരുന്നു. ഉടൻ തന്നെ നഗരത്തിലെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. സംസ്‌കാരം വെള്ളിയാഴ്ച രാവിലെ 10ന് വള്ളക്കടവ് സെന്റ് ആന്റണീസ് പള്ളിയിൽ നടക്കും.