കൊട്ടാരക്കര മേലില വില്ലേജില്‍ കൈക്കൂലി വാങ്ങുന്നതിനിടെ വില്ലേജ് ഫീല്‍ഡ് അസിസ്റ്റന്റ് വിജിലന്‍സ് പിടിയില്‍

കൊല്ലം: കൊട്ടാരക്കര മേലില വില്ലേജ് ഓഫീസിലെ വില്ലേജ് ഫീൽഡ് അസിസ്റ്റന്റ് അജയകുമാർ ജെ 1000/- രൂപ കൈക്കൂലി വാങ്ങുന്നതിനിടെ വിജിലൻസ് അറസ്റ്റ് ചെയ്തു. വിളക്കുടി വില്ലേജിലെ താമസക്കാരനായ പരാതിക്കാരൻ കേരള ബാങ്കിൻറെ കുന്നിക്കോട് ശാഖയിൽ നിന്നും ലോൺ എടുക്കുന്നതിനായി മേലില വില്ലേജിലെ 17/14819 നമ്പർ തണ്ടപ്പേരിൽപ്പെട്ട റീ സർവേ 212/5-2 ൽ ഉൾപ്പെട്ട 4.88 ആർ വസ്തുവിന്റെ കൈവശാവകാശ സർട്ടിഫിക്കറ്റ്, ലോക്കേഷൻ സർട്ടിഫിക്കറ്റ്,നോൺ അറ്റാച്ച്മെൻറ് സർട്ടിഫിക്കറ്റ്, എന്നിവ ആവശ്യപ്പെട്ടുകൊണ്ട് 30/09/ തിൽ മേലില വില്ലേജ് ഓഫീസർക്ക് അപേക്ഷ നൽകിയിരുന്നു.

തുടർന്ന് പല പ്രാവശ്യം സർട്ടിഫിക്കറ്റ് നൽകാത്തതിനാൽ പരാതിക്കാരൻ മേലില വില്ലേജ് ഓഫീസിലെ വില്ലേജ് ഫീൽഡ് അസിസ്റ്റന്റ് അജയകുമാറിനെ കണ്ടപ്പോൾ ഇയാൾ 1000/രൂപ കൈക്കുലി ആവശ്യപ്പെട്ടു. പരാതിക്കാരൻ ഈ വിവരം കൊല്ലം വിജിലൻസ് യൂണിറ്റ് ഡി.വൈ.എസ്.പി അബ്ദുൽ വഹാബിനെ അറിയിക്കുകയും അദ്ദേഹത്തിന്റെ
നിർദ്ദേശപ്രകാരം കെണി ഒരുക്കി. വില്ലേജ് ഫീൽഡ് വൈകുന്നേരം 4 മണിയോടെ വില്ലേജ് ഓഫീസിൽ വച്ച് കൈക്കൂലി വാങ്ങുന്നതിനിടെ വിജിലൻസ് സംഘം അസിസ്റ്റന്റിനെ അറസ്റ്റ് ചെയ്യുകയാണുണ്ടായത്.

വിജിലൻസ് സംഘത്തിൽ കൊല്ലം യുണിറ്റ് ഡെപ്യൂട്ടി സൂപ്രണ്ട് ഓഫ് പോലീസ് അബ്ദുൽ വഹാബിനെ കൂടാതെ ഇൻസ്പെക്ടർമാരായ .ബിജു, ജോഷി, ജി എസ്‌ ഐ മാരായ, .രാജേഷ്, ജയഘോഷ്, സി പി ഓ മാരായ ഷിബുസക്കറിയ, ഗോപകുമാർ, ദേവപാലൻ, ശരത്ത്, അജീഷ്, അജീഷ്, ഷൈൻ എന്നിവർ ഉൾപ്പെട്ട സംഘമാണ് പ്രതിയെ അറസ്റ്റ് ചെയ്തത്. പ്രതിയെ തിരുവനന്തപുരം വിജിലൻസ് കോടതി മുമ്പാകെ ഹാജരാക്കും.

അഴിമതികൾ പൊതുജനങ്ങളുടെ സംബന്ധിച്ച വിവരങ്ങൾ ലഭിക്കുകയാണെങ്കിൽ വിജിലൻസിന്റെ ടോൾ ഫ്രീ നമ്പരായ 1064 എന്ന നമ്പരിലോ 8592900900 എന്ന നമ്പരിലോ വാട്സ് ആപ് നമ്പരായ 9447789100 എന്ന നമ്പരിലോ അറിയിക്കണമെന്ന് വിജിലൻസ് ഡയറക്ടർ ശ്രീ. മനോജ് എബ്രഹാം. ഐ.പി.എസ് ജനങ്ങളോട് അഭ്യർത്ഥിച്ചു.