ന്യൂഡല്ഹി: 32 മെഗാപിക്സലിന്റെ പോപ് അപ്പ് സെല്ഫി ക്യാമറയുമായി വിവോ വി 15 പ്രോ ഇന്ത്യന് വിപണിയിൽ. ആറ് ജിബി റാം + 128 ജിബി ഇന്റേണല് സ്റ്റോറേജ് പതിപ്പാണ് അവതരിപ്പിച്ചത്. 28,990 രൂപയാണ് ഇതിന്റെ വില. ഫ്ലിപ്പ്കാര്ട്ടിലൂടെ മാര്ച്ച് ആറ് മുതല് ഫോണ് വിൽപ്പനയ്ക്കെത്തും. ഫെബ്രുവരി 20 മുതല് ഫോണ് മുന്കൂര് ബുക്ക് ചെയ്യാം.
പോപ്പ് അപ്പ് സെല്ഫി ക്യാമറയുമായി ഇന്ത്യയിലെത്തുന്ന വിവോയുടെ രണ്ടാമത്തെ സ്മാര്ട്ഫോണ് ആണ് വിവോ വി15 പ്രോ . നേരത്തെ വിവോ നെക്സ് സ്മാര്ട്ഫോണില് പോപ്പ് അപ്പ് ക്യാമറയായിരുന്നു ഉണ്ടായിരുന്നത്. അഞ്ചാം തലമുറ ഇന് ഡിസ്പ്ലേ ഫിംഗര്പ്രിന്റ് സെന്സറാണ് വിവോ വി 15 പ്രോയിലും ഉപയോഗിച്ചിട്ടുള്ളത്. ഇതുവഴി 0.37 സെക്കന്റില് അണ്ലോക്കിങ് സാധ്യമാണെന്ന് കമ്പനി അവകാശപ്പെടുന്നു.
6.39 ഇഞ്ച് ഫുള് എച്ച്ഡി പ്ലസ് സൂപ്പര് അമോലെഡ് അള്ട്രാ ഫുള്വ്യൂ ഡിസ്പ്ലേ. 2340x 1080 പിക്സല് റസലൂഷനും ഉണ്ട്. 2.0 GHz ഒക്റ്റാകോര് സ്നാപ്ഡ്രാഗണ് 675 പ്രൊസസറാണ് ഫോണിന് ശക്തിപകരുന്നത്. ആറ് ജിബി റാമും 128 ജിബി ഇന്റേണല് സ്റ്റോറേജുമുള്ള ഫോണില് 256 ജിബി വരെയുള്ള മൈക്രോ എസ്ഡി കാര്ഡ് ഉപയോഗിക്കാനുള്ള സൗകര്യമുണ്ടാവും. 3,700 എംഎഎച്ച് ബാറ്ററിയില് അതിവേഗ ചാര്ജിങ് സാങ്കേതിക വിദ്യ നല്കിയിട്ടുണ്ട്. ട്രിപ്പിള് റിയര് ക്യാമറയാണ് ഫോണിന്. ഇതില് പ്രധാന സെന്സര് 48 മെഗാപിക്സലിന്റെ ക്വാഡ് പിക്സല് സെന്സറാണ്. എട്ട് മെഗാപിക്സലിന്റേയും അഞ്ച് മെഗാപിക്സലിന്റേയും സെന്സറുകളാണ് ട്രിപ്പിള് ക്യാമറയിലെ മറ്റു സെന്സറുകള്. ആന്ഡ്രോയിഡ് 9 അടിസ്ഥാനമാക്കിയുള്ള ഫണ് ടച്ച് എസ് 9 ആണ് വിവോ വി 15 പ്രോയിലുള്ളത്.