'നാട്ടിലെ ആണ്‍കുട്ടികളുടെയും പെണ്‍കുട്ടികളുടെയും കല്യാണം മുടക്കുന്ന ആളെ തിരിച്ചറിഞ്ഞാല്‍ നിങ്ങളുടെ പ്രായം, ജാതി, മതം, രാഷ്ട്രീയം എന്നിവ നോക്കാതെ വീട്ടില്‍ കയറി തല്ലും'; കല്യാണം മുടക്കികള്‍ക്ക് മുന്നറിയിപ്പുമായി ഫ്‌ളക്‌സ് ബോര്‍ഡ് സ്ഥാപിച്ച് ചെറുപ്പക്കാർ; മണിക്കൂറുകൾക്കുള്ളില്‍ നശിപ്പിച്ചു

ആലപ്പുഴ:  കല്യാണങ്ങള്‍ ഒരുപറ്റം ആളുകള്‍ അപവാദങ്ങള്‍ പറഞ്ഞ് മുടക്കുന്നു. ഇതിന് പിന്നിലുള്ളവര്‍ ആരാണെന്ന് കണ്ടെത്താന്‍ സാധിക്കാതെ വന്നതോടെ ഒരു പറ്റം ചെറുപ്പക്കാര്‍ കല്യാണം മുടക്കികള്‍ക്ക് മുന്നറിയിപ്പായി ഫ്‌ളക്‌സ് ബോര്‍ഡ് സ്ഥാപിച്ചു.

ആലപ്പുഴ വെളിയനാട് പഞ്ചായത്ത് പുളിന്‍ചുവട് ജങ്ഷനിലാണ് ഫ്‌ളക്‌സ് ബോര്‍ഡ് സ്ഥാപിച്ചത്. പ്രദേശത്തെ ചെറുപ്പക്കാരായ യുവാക്കള്‍ക്ക് നിരവധി കല്യാണങ്ങള്‍ വരാറുണ്ടെങ്കിലും പ്രത്യേകിച്ച് കാരണങ്ങളില്ലാതെ  മുടങ്ങിപ്പോകുന്നത് പതിവാണ്.

സംഭവത്തെക്കുറിച്ച് അന്വേഷിച്ചപ്പോഴാണ് ഇതിനുപിന്നില്‍ നാട്ടിലുള്ള ചില ആളുകളാണെന്ന് മനസിലായത്.  ഫ്‌ളക്‌സ് ബോര്‍ഡില്‍ പറയുന്നത് ഇങ്ങനെ:

' കല്യാണം മുടക്കികളുടെ ശ്രദ്ധയ്ക്ക്. നാട്ടിലെ ആണ്‍കുട്ടികളുടെയും പെണ്‍കുട്ടികളുടെയും കല്യാണം മുടക്കുന്ന ആളെ തിരിച്ചറിഞ്ഞാല്‍ നിങ്ങളുടെ പ്രായം, ജാതി, മതം, രാഷ്ട്രീയം എന്നിവ നോക്കാതെ അത് ഏത് ചെങ്ങാതിയുടെ തന്തയായാലും തള്ളയായാലും വീട്ടില്‍ കയറി തല്ലുന്നതായിരിക്കും'.

ഫ്‌ളക്‌സ് ആരാണ് സ്ഥാപിച്ചതെന്ന് വ്യക്തമല്ലെങ്കിലും നിലവില്‍ കീറിനശിപ്പിച്ച നിലയിലാണ്.