സ്റ്റോപ്പ് മെമ്മോ ലംഘിച്ച് റോഡ് നിര്‍മാണത്തിന്റെ മറവില്‍ അനധികൃതമായി പാറ പൊട്ടിച്ച കരാറുകാരനെതിരെ കേസ്; രണ്ട് ടോറസ് ലോറികൾ പിടിച്ചെടുത്തു

നെടുങ്കണ്ടം: റോഡ് നിര്‍മാണത്തിന്റെ മറവില്‍ അനധികൃതമായി പാറ പൊട്ടിച്ച കരാറുകാരനെതിരെ റവന്യൂവകുപ്പ് കേസെടുത്തു. ഇവരുടെ രണ്ട് ടോറസ് ലോറികളും ഉദ്യോഗസ്ഥര്‍ പിടിച്ചെടുത്തു. ചേമ്പളത്താണ് പുറമ്പോക്ക് ഭൂമിയില്‍ നിന്നും അനധികൃതമായി പാറ പൊട്ടിച്ചുകടത്തിയത്.

പാറ പൊട്ടിക്കുന്നത് ശ്രദ്ധയില്‍ പെട്ടതിനെത്തുടര്‍ന്ന് നല്‍കിയ സ്റ്റോപ്പ് മെമ്മോ ലംഘിച്ചാണ് കരാറുകാരന്‍ ലോഡുകണക്കിന് കല്ല് ഇവിടെനിന്നും കടത്തിയത്. കമ്പംമെട്ട് - വണ്ണപ്പുറം സംസ്ഥാന പാതയുടെ നിര്‍മ്മാണം നടക്കുന്നതിനോടനുബന്ധിച്ച് ചേമ്പളം - എഴുകുംവയല്‍ റോഡില്‍ പാറപൊട്ടിക്കാന്‍ അനുമതി നല്‍കിയിരുന്നു.

എന്നാല്‍, അനുമതി ലഭിച്ചതിലധികം സ്ഥലത്തെ പാറ പൊട്ടിക്കുകയായിരുന്നു. പരാതി ലഭിച്ചതിനെത്തുടര്‍ന്ന് റവന്യൂ ഉദ്യോഗസ്ഥര്‍ സ്ഥലത്തെത്തി രേഖകള്‍ ഹാജരാക്കാന്‍ കരാറുകാരോട് ആവശ്യപ്പെട്ടിരുന്നെങ്കിലും ഇതുവരെ രേഖകള്‍ ഹാജരാക്കാന്‍ ഇവര്‍ തയ്യാറായില്ല.