പ്രധാനമന്ത്രി എത്താൻ മണിക്കൂറുകൾ മാത്രം അവശേഷിക്കെ 'ഗോ ബാക്ക്' വിളി; കൊച്ചിയിൽ യൂത്ത് കോൺഗ്രസ് പ്രവർത്തകൻ അറസ്റ്റിൽ

കൊച്ചി: പ്രധാനമന്ത്രി നരേന്ദ്ര മോദി കൊച്ചിയിലെത്താൻ മണിക്കൂറുകൾ മാത്രം ബാക്കിനിൽക്കെ 'ഗോ ബാക്ക് ' മുദ്രാവാക്യവുമായി എത്തിയ യൂത്ത് കോൺഗ്രസ് പ്രവർത്തകൻ അറസ്റ്റിൽ.

തേവര സേക്രട്ട് ഹാർട്ട് കോളേജ് പരിസരത്താണ് യൂത്ത് കോൺഗ്രസിൻ്റെ ഒരു പ്രവർത്തകൻ മാത്രം എത്തി മുദ്രാവാക്യം വിളിച്ചു പ്രതിഷേധിച്ചത്.

പ്രധാനമന്ത്രി പങ്കെടുക്കുന്ന 'യുവം' സമ്മേളനവേദിയുടെ പ്രധാനകവാടത്തിന് മുന്നിലായിരുന്നു പ്രതിഷേധം നടന്നത്. മുദ്രാവാക്യം വിളിയുമായി എത്തിയ പ്രവർത്തകനെ സ്ഥലത്തുണ്ടായിരുന്ന ബിജെപി പ്രവർത്തകർ പിടിച്ചു മാറ്റാൻ ശ്രമിച്ചത് നേരിയ സംഘർഷത്തിന് ഇടയാക്കി.

പ്രധാനമന്ത്രിയുടെ സന്ദർശനത്തിൻ്റെ ഭാഗമായി രാവിലെ മുതൽ തേവര ഭാഗത്ത് കനത്ത സംരക്ഷയാണ് പോലീസ് ഒരുക്കിയിരിക്കുന്നത്. വിവിധ കേന്ദ്രങ്ങളിൽ രഹസ്യാന്വേഷണ വിഭാഗത്തിന്റെ നിരീക്ഷണവും ഏർപ്പെടുത്തിയിട്ടുണ്ട്. കൊച്ചിയിലെ യൂത്ത് കോൺഗ്രസ് പ്രവർത്തകരെ പോലീസ് കരുതൽ തടങ്കലിലാക്കിയിരുന്നു.

ഡിസിസി ജനറൽ സെക്രട്ടറി അജിത്ത് അമീർ ബാബ ഉൾപ്പെടെ 12 പേരെയാണ് പോലീസ് കരുതൽ തടങ്കലിലാക്കിയത്.