മാങ്ങാ മോഷണം: പോലീസുകാരനെ സര്‍വീസില്‍ നിന്നും പിരിച്ചുവിട്ടു; നടപടി ഇയാൾക്കെതിരെയുള്ള മറ്റു കേസുകളും പരിഗണിച്ച്

തൊടുപുഴ: മാങ്ങാ മോഷ്ടിച്ച് കുപ്രസിദ്ധനായ പോലീസുകാരനെ സര്‍വീസില്‍ നിന്നും പിരിച്ചുവിട്ടു. ഇടുക്കി എ.ആര്‍ ക്യാമ്പിലെ സി.പി.ഒ മുണ്ടക്കയം വണ്ടന്‍പതാല്‍ പുതുപ്പറമ്പില്‍ പി.വി.ഷിഹാബിനെതിരേയാണ് നടപടിയെടുത്തത്.

ഇടുക്കി എസ്.പിയാണ് ഇയാളെ പിരിച്ചുവിട്ട് ഉത്തരവിറക്കിയത്. മാങ്ങാ മോഷണം നടത്തുന്നതിന് മുന്‍പും ഇയാള്‍ക്കെതിരേ കേസുകളുണ്ടായിരുന്നു. ഇത് കൂടി പരിഗണിച്ചാണ് ആഭ്യന്തര വകുപ്പിന്റെ നടപടി.

കഴിഞ്ഞ സെപ്റ്റംബര്‍ 30ന് പുലര്‍ച്ചെയാണ് കാഞ്ഞിരപ്പള്ളി ടൗണിലെ പഴം-പച്ചക്കറി കടയുടെ മുന്നില്‍ നിന്നും ഇയാള്‍ മാങ്ങാ മോഷ്ടിച്ചത്.

സംഭവത്തിന്റെ സി.സി.ടിവി ദൃശ്യങ്ങള്‍ പുറത്തു വന്നതിന് പിന്നാലെ അന്വേഷണ വിധേയമായി ഇയാളെ സര്‍വീസില്‍ നിന്നും സസ്‌പെന്‍ഡ് ചെയ്തിരുന്നു.  നിസാര വകുപ്പുകള്‍ ചുമത്തി  കേസ് ഒഴിവാക്കാന്‍ നോക്കിയെങ്കിലും കോടതിയുടെ ഇടപെടലിൽ കുടുങ്ങുകയായിരുന്നു.