കുഞ്ഞുങ്ങളെ എങ്ങനെ കുളിപ്പിക്കണം, ഡയപ്പര് എപ്പോഴൊക്കെയാണ് ഉപയോഗിക്കേണ്ടത് ഇതേക്കുറിച്ചൊക്കെ പല അമ്മമാർക്കും കൃത്യമായി അറിയണമെന്നില്ല.
കുഞ്ഞ് ജനിച്ച് കഴിഞ്ഞാല് പ്രധാനമായി ശ്രദ്ധിക്കേണ്ട ഒന്നാണ് ശിശുസംരക്ഷണം. നവജാതശിശുവിനെ പരിചരിക്കുമ്പോള് ശ്രദ്ധിക്കേണ്ടതായ ഒരുപാട് കാര്യങ്ങളുണ്ട് ...
കുഞ്ഞിനെ എന്നും കുളിപ്പിക്കണമെന്നില്ല. എങ്കിലും ശരീരം എല്ലാ ദിവസവും വൃത്തിയാക്കുകയും വേണം. വളരെ ശ്രദ്ധയോടെയാകണം കുഞ്ഞിന്റെ ശരീരം വൃത്തിയാക്കാന്.
നവജാത ശിശുക്കള്ക്ക് കൂടുതലും കോട്ടണ് വസ്ത്രങ്ങള് ധരിപ്പിക്കുന്നതാണ് നല്ലത്. കുഞ്ഞിന്റെ കണ്ണുകള് വൃത്തിയാക്കുമ്പോള് ഉള്വശത്ത് നിന്നു പുറത്തേക്ക് മെല്ലെ തുടച്ചെടുക്കുക. ചെവിയുടെ പിന്വശം മാത്രമേ തുടയ്ക്കാവൂ. ഒരുകാരണവശാലും ചെവിയുടെ ഉള്ഭാഗത്ത് ബഡ്സോ കോട്ടണ് തുണിയോ ഉപയോഗിക്കരുത്.
കുഞ്ഞിന്റെ കഴുത്തും നെഞ്ചും വളരെ മൃദുവായി വേണം വൃത്തിയാക്കാൻ. മടക്കുള്ള ഭാഗം പ്രത്യേകം ശുചിയാക്കുക. കക്ഷവും കൈയും തുടച്ചതിനു ശേഷം കുഞ്ഞിനെ ഉണങ്ങിയ ടൗവല് കൊണ്ടു പൊതിയുക. പൊക്കിള്ക്കൊടി പൊഴിഞ്ഞിട്ടില്ലെങ്കില് അതു നനയാതെ സൂക്ഷിക്കണം. പുറകുവശവും നന്നായി ശ്രദ്ധയോടെ തുടയ്ക്കണം.
ഗര്ഭകാലത്ത് അമ്മയില് നിന്നും കുഞ്ഞിന് ആവശ്യമായ വായുവും ആഹാരവും കിട്ടുന്നത് പൊക്കിള്ക്കൊടി വഴിയാണ്. പൊക്കിള്ക്കൊടി ഈര്പ്പം തട്ടാതെ സൂക്ഷിക്കുക. അഥവാ ഈര്പ്പം തട്ടിയാല് ഉണങ്ങിയ തുണികൊണ്ട് ശ്രദ്ധയോടെ തുടയ്ക്കണം.
കുഞ്ഞുങ്ങൾ ഉറങ്ങുമ്പോഴാണ് പ്രത്യേകം ശ്രദ്ധിക്കേണ്ടത്. ഉറങ്ങുമ്പോള് മലര്ത്തിക്കിടത്താന് ശ്രദ്ധിക്കണം. കുഞ്ഞിന്റെ പുതപ്പ് ഭാരമുള്ളതായിരിക്കരുത്. നേർത്തതും കട്ടി കുറഞ്ഞതുമായിരിക്കണം.
നവജാതശിശുവിനെ ആദ്യത്തെ മൂന്ന് ആഴ്ച്ചകളില് എപ്പോഴും ഒരു ടൗവല് കൊണ്ടു പൊതിയാന് ശ്രദ്ധിക്കണം. ഉറക്കം വരുന്ന കുഞ്ഞിനെ തനിയെ കിടന്നുറങ്ങാന് സഹായിക്കുക. എടുത്തോ, തൊട്ടിലില് ആട്ടിയോ ഉറക്കുവാന് ശ്രമിച്ചാല് അതു ശീലമാകും.