ഇൻസ്റ്റാൾമെന്റ് പിരിവിനെത്തി വീട്ടിൽക്കയറി പതിനഞ്ചുകാരനുനേരേ ലൈംഗികാതിക്രമം;  തുണി വിൽപ്പനക്കാരൻ അറസ്റ്റില്‍

തൊടുപുഴ: മാതാപിതാക്കളില്ലാത്ത സമയം വീട്ടില്‍കയറി പതിനഞ്ചുകാരനുനേരെ ലൈംഗികാതിക്രമം നടത്തിയയാളെ പോലീസ് അറസ്റ്റു ചെയ്തു.

പെരുമ്പാവൂര്‍ മുടിക്കല്‍ പാലക്കാട്ടുതാഴം മുക്കാട വീട്ടിൽ മൈതീനാ(46)ണ് പിടിയിലായത്. മണക്കാട് നെല്ലിക്കാവില്‍ കഴിഞ്ഞ ഏഴിനായിരുന്നു സംഭവം.

തുണി ഇന്‍സ്റ്റാള്‍മെന്റില്‍ വില്‍പ്പന നടത്തുന്ന പ്രതി ഇതിന്റെ പണം പിരിക്കാനെത്തിയപ്പോഴായിരുന്നു അതിക്രമം നടത്തിയത്. പിന്നീട് വീട്ടിലെത്തി അമ്മയോട് കുട്ടി വിവരം പറയുകയായിരുന്നു.  കഴിഞ്ഞ 21ന് വീണ്ടുമെത്തിയപ്പോഴും  കുട്ടിയ്ക്കുനേരെ ലൈംഗികാതിക്രമത്തിനു മുതിര്‍ന്നപ്പോള്‍ മാതാവ് കാണുകയായിരുന്നു.

തുടര്‍ന്ന് ഇവര്‍ ചൈൽഡ് ലൈനിൽ പരാതി നല്‍കുകയും കുട്ടി പോലീസില്‍ നല്‍കിയ മൊഴിയുടെ അടിസ്ഥാനത്തിലുമാണ് പ്രതിയെ പിടികൂടിയത്. ഇയാള്‍ക്കെതിരെ പോക്‌സോവകുപ്പു പ്രകാരം കേസെടുത്തു. പ്രതിയെ ഇന്ന് കോടതിയില്‍ ഹാജരാക്കും.