തലശ്ശേരി ജനറൽ ആശുപത്രിയിൽ വാഹനാപകടത്തിൽ ചികിത്സയ്ക്കെത്തിയ രോഗി ഡോക്ടറെ മർദ്ദിച്ചു

തലശ്ശേരി: തലശ്ശേരി ജനറൽ ആശുപത്രിയിൽ രോഗി ഡോക്ടറെ ആക്രമിച്ചതായി പരാതി. വാഹനാപകടത്തെത്തുടർന്ന് ഇന്നലെ അർധരാത്രി ജനറൽ ആശുപത്രിയിലെത്തിച്ച പാലയാട് പാറപ്രം സ്വദേശി മഹേഷാണ് ചികിത്സ നൽകുന്നതിനിടെ ഡോക്ടറെ മർദ്ദിച്ചത്.

പുലർച്ചെ 2.30നാണ് വാഹന അപകടത്തിൽ പരിക്കേറ്റ മഹേഷിനെ ചികിത്സയ്ക്കായി ജനറൽ ആശുപത്രിയിലെത്തിച്ചത്. ഡ്യൂട്ടിയിൽ ഉണ്ടായിരുന്നത് അമൃതരാജി എന്ന വനിതാ ഡോക്ടറായിരുന്നു. ചികിത്സ നൽകുന്നതിനിടെ, മഹേഷ്, ഡോക്ടറെ അസഭ്യം പറയുകയും കൈ കൊണ്ട് അടിക്കുകയുമായിരുന്നു. ഇയാൾ മദ്യപിച്ചിരുന്നതായും ഡോക്ടർ ആരോപിച്ചു.

ഡോ. അമൃത രാഗി പൊലീസിൽ പരാതി നൽകി. ഡോക്ടറുടെ പരാതിയിൽ പോലീസ് അന്വേഷണം ആരംഭിച്ചു.  സംഭവത്തിൽ പ്രതിഷേധിച്ച് തലശ്ശേരിയിൽ ഉച്ചയ്ക്ക് ശേഷം ഡോക്ടർമാർ പണിമുടക്കും.