കോട്ടയത്ത് എം.സി. റോഡിൽ രണ്ടു സ്കൂട്ടറും ഒരു കാറും കെ.എസ്.ആർ.ടി.സി. സ്കാനിയ ബസും  കൂട്ടിയിടിച്ചു; സ്കൂട്ടർ യാത്രികയ്ക്ക് പരിക്ക്

കോട്ടയം:  മണിപ്പുഴയിൽ വാഹനങ്ങളുടെ കൂട്ടയിടി. എം.സി. റോഡിൽ രണ്ടു സ്കൂട്ടറും ഒരു കാറും കെ.എസ്.ആർ.ടി.സി. സ്കാനിയ ബസുമാണ് കൂട്ടിയിടിച്ചത്. അപകടത്തിൽ  കാരിത്താസ് ആശുപത്രിയിലെ ജീവനക്കാരിയായ സ്കൂട്ടർ യാത്രിക  ആലപ്പുഴ പുളിങ്കുന്ന് കണ്ണാടി ഇടശേരിപ്പറമ്പിൽ ധന്യ തോമസിന്  പരിക്കേറ്റു.

ബുധനാഴ്ച രാവിലെ എട്ടിന് സിവിൽ സപ്ലൈസ് പെട്രോൾ പമ്പിനു മുന്നിലായിരുന്നു അപകടം. കോട്ടയം ഭാഗത്തുനിന്ന് കെ.എസ്.ആർ.ടി.സി.  സ്കാനിയ ബസ് വരുന്നതിനിടെ എതിർ ഭാഗത്തുനിന്ന് എത്തിയ സ്കൂട്ടറിൽ ഇടിക്കാതിരിക്കാൻ വെട്ടിച്ച കാർ ബസുമായി കൂട്ടിയിടിക്കുകയായിരുന്നു. ഈ സമയം സ്കൂട്ടറിൽ ബസ് തട്ടുകയും ചെയ്തു.  ഇതുവഴിയെത്തിയ മറ്റൊരു സ്കൂട്ടർ യാത്രികനും അപകടത്തിൽപ്പെട്ടു.

ഓടിക്കൂടിയ യാത്രക്കാർ ചേർന്നാണ് പരിക്കേറ്റ യുവതിയെ രക്ഷിച്ചത്.  യുവതിയെ അഭയ ആംബുലൻസിൽ കോട്ടയം ഭാരത് ആശുപത്രിയിലേക്ക് മാറ്റി. അപകടത്തെത്തുടർന്ന് എം.സി. റോഡിൽ വൻ ഗതാഗതക്കുരുക്കുണ്ടായി.