തിരുവനന്തപുരത്ത് വന്‍ മോഷണം; ആളില്ലാത്ത നേരം വീട്ടില്‍ നിന്ന് 100 പവന്‍ സ്വര്‍ണാഭരണം കവര്‍ന്നു

തിരുവനന്തപുരം: തിരുവനന്തപുരത്ത് വന്‍ മോഷണം. വീട്ടില്‍ നിന്ന് 100 പവന്‍ സ്വര്‍ണാഭരണം മോഷണം പോയി. തിരുവനന്തപുരം മണക്കാട് സ്വദേശി രാമകൃഷ്ണന്റെ വീട്ടിലായിരുന്നു മോഷണം. വീട്ടുകാര്‍ ക്ഷേത്രത്തില്‍ പോയ സമയത്താണ് മോഷണം. ഫോര്‍ട്ട് സ്‌റ്റേഷന്‍ പരിധിയിലാണ് സംഭവം. വീട്ടുടമ രാമകൃഷ്ണന്‍ ദുബൈയില്‍ ജോലി ചെയ്യുകയാണ്.

മകന്റെ ഉപനയന ചടങ്ങുകള്‍ക്കാണ് ലോക്കറിലിരുന്ന 100 പവന്‍ സ്വര്‍ണം വീട്ടുകാര്‍ എടുത്തത്. പിന്നീട് ഇവ രണ്ടാം നിലയിലെ മുറിയിലെ അലമാരയില്‍ സൂക്ഷിച്ചിരിക്കുകയായിരുന്നു.

മുറിക്കുള്ളില്‍ സാധനങ്ങള്‍ വലിച്ചു വാരിയിട്ട നിലയിലാണ്. രണ്ടാം നിലയിലെ പുറത്തേക്കുള്ള വാതില്‍ തുറന്നു കിടക്കുകയായിരുന്നു. പോലീസ് അന്വേഷണം ഊർജിതമാക്കി.