‘കുംഭമേളയായാലും റംസാന്‍ ആയാലും കൊവിഡ്-19 പ്രേട്ടോകോള്‍ പാലിക്കേണ്ടതുണ്ട്; അത് ഉണ്ടാവുന്നില്ല; അതുകൊണ്ടാണ് കുംഭമേള പ്രതീകാത്മകമായി നടത്തേണ്ടതുണ്ടെന്ന് നമുക്ക് പറയേണ്ടി വരുന്നത്; അമിത് ഷാ 

ന്യൂസ് ബ്യൂറോ, ഡല്‍ഹി
Monday, April 19, 2021

ഡല്‍ഹി: രാജ്യത്ത് കൊവിഡ്-19 സാഹചര്യം രൂക്ഷമായ പശ്ചാത്തലത്തില്‍ കുംഭമേളയിലും റംസാന്‍ ആഘോഷങ്ങളിലും പങ്കെടുക്കുന്നവര്‍ പ്രോട്ടോകോള്‍ പാലിക്കുന്നില്ലെന്ന വിമര്‍ശനവുമായി കേന്ദ്ര ആഭ്യന്തരമന്ത്രി അമിത്ഷാ. നിലവില്‍ ഇന്ത്യയിലെ കൊവിഡ്-19 സാഹചര്യം മോശമാണെന്നും ഷാ പറഞ്ഞു.

‘കുംഭമേളയായാലും റംസാന്‍ ആയാലും കൊവിഡ്-19 പ്രേട്ടോകോള്‍ പാലിക്കേണ്ടതുണ്ട്. അത് ഉണ്ടാവുന്നില്ല. അതുകൊണ്ടാണ് കുംഭമേള പ്രതീകാത്മകമായി നടത്തേണ്ടതുണ്ടെന്ന് നമുക്ക് പറയേണ്ടി വരുന്നത്.’ അമിത് ഷാ പറഞ്ഞു. കൊവിഡ്-19 രണ്ടാം തരംഗത്തെ നേരിടാന്‍ കേന്ദ്രം ആവശ്യമായ തീരുമാനങ്ങള്‍ എടുത്തിട്ടുണ്ടെന്നും അമിത്ഷാ പറഞ്ഞു.

കൊവിഡ്-19 ആദ്യ തരംഗത്തില്‍ സര്‍ക്കാര്‍ അലംഭാവം കാട്ടിയെന്നും മരുന്നുകളുടേയും ഓക്‌സിജന്റേയും ദൗര്‍ലഭ്യം ഉണ്ടായെന്നുമുള്ള വാദം ഷാ നിഷേധിച്ചു. എന്നാല്‍ ഓരോ തരംഗത്തിലും കൊവിഡ്-19 പൂര്‍വ്വാധികം വേഗതയിലാണ് വ്യാപിക്കുന്നതെന്നും എന്നാല്‍ നമ്മള്‍ ഇതിനേയും അതിജീവിക്കുമെന്നും അമിത് ഷാ കൂട്ടിചേര്‍ത്തു.

എന്നാല്‍ കൊവിഡ്-19 സാഹചര്യത്തിലും പശ്ചിമ ബംഗാള്‍ നിയമസഭ തെരഞ്ഞെടുപ്പ് പ്രചാരണങ്ങളുടെ ഭാഗമായി ഷാ പങ്കെടുത്ത റാലിയില്‍ കൊവിഡ് മാനദണ്ഡങ്ങള്‍ പാലിക്കാതെ ആയിരങ്ങളാണ് പങ്കെടുത്തത്. ഇത് പരാമര്‍ശിക്കാതെ പഞ്ചാബ്, ഗുജറാത്ത്, മഹാരാഷ്ട്ര, കേരള. ഡല്‍ഹി തുടങ്ങിയ സംസ്ഥാനങ്ങളിലെ കൊവിഡ് സാഹചര്യം മോശമാണെന്ന് അമിത്ഷാ പറഞ്ഞു

×