ദില്ലി: പൗരത്വ നിയമഭേദഗതിക്കെതിരായ പ്രതിഷേധത്തെ തുടർന്ന് ദില്ലി പൊലീസ് അറസ്റ്റ് ചെയ്ത് ഭീം ആര്മി നേതാവ് ചന്ദ്രശേഖര് ആസാദ് ജയിൽ മോചിതനായി. വൻ സ്വീകരണമാണ് ജയിലിന് പുറത്ത് ആസാദിന് അണികൾ നൽകിയത്.
ഇന്നലെയാണ് ദില്ലി തീസ് ഹസാരി കോടതി ഉപാധികളോടെ ആസാദിന് ജാമ്യം അനുവദിച്ചത്. എന്നാൽ നടപടിക്രമങ്ങൾ പൂർത്തിയാക്കി ഇന്നു മാത്രമാണ് ആസാദിന് തീഹാർ ജയിലിൽ നിന്നും ഇറങ്ങാനായത്.
അടുത്ത ഒരുമാസത്തേക്ക് ദില്ലിയില് പ്രവേശിക്കരുതെന്ന ഉപാധിയോടെയാണ് കോടതി ആസാദിന് ജാമ്യം അനുവദിച്ചിരിക്കുന്നത്. ഫെബ്രുവരി 16-ന് മുന്പായി ആസാദ് ചികിത്സയ്ക്കായി ദില്ലി എയിംസില് പോകാന് ഉദ്ദേശിക്കുന്നുവെങ്കില് ദില്ലി പൊലീസിനെ മുന്കൂട്ടി അറിയിക്കണമെന്നും കോടതി നിര്ദേശിച്ചിട്ടുണ്ട് .ഉത്തര്പ്രദേശിലെ സഹന്പുര് പൊലീസ് സ്റ്റേഷനില് എല്ലാ ശനിയാഴ്ചയും ഹാജരാകണമെന്നും ആസാദിന്റെ ജാമ്യവ്യവസ്ഥയില് നിര്ദേശിക്കുന്നു.